الأحد، 7 مارس، 2010

أنـــــــا




هل تعرف من انا ؟ انا الذي اتفق العالم عليه .. ألا يعيش حر.!

انا الذي تم طعنه بخنجر مسموم .. لأني ضمير الشعوب

انا الذي شردت عائلته.. نتيجه لمفاوضات خادعه.!

انا الذي اموت كل يوم بسبب الدفاع عن ارضي.!

انا الذي تم تقسيمه بين ضفه و قطاع .. وسلطة وهميه .!

انا الذي تم طرده من بيته .. لأجل تسكين , و تمكين .. مجموعه غرباء مستوطنين.!

انا الذي لا أجد من يقف بجانبي .. ومساجدي و كنائسي يتم تهويدها .!

انا الذي تنازل عنه الجميع , وتركوني وحيدا .. اكافح بشرف .!


. انا الذي ادعي الله كل يوم حتي ينصرني علي اعدائي



فهل تعرف من انا ؟؟!

اجيبك بكل فخر .. انا فلسطين

تسعه و عشريــــــــن سنه


تسعه و عشرين سنه من الظلم ..

من الفقر ..


من اليأس ..


من التخلف ..


من التبعيه ..


من القمع ..


من الاستبداد ..


من التواطؤ ..


من البجاحه ..


من الخيانه ..


من الفساد ..


من الاهانه ..


من التقييد للحريات ..


من المحاكمات العسكريه للمدنيين ..


من الديكتاتوريه المطلقه ..


من تدني مستوي التعليم ..


من اهدار حقوق المواطن ..


من بيع اموال الشعب ..


من السيطره علي اراده الشعب ..


من تصفيه المعارضه ..


من التلاعب بالدستور ..


من الخصومات العربيه ..


من انعدام الحكم الديموقراطي ..


من سيطره حزب واحد علي البلد ..


من اعتقال الاحرار و اطلاق سراح المنافقين..


من الشجب و الادانه فقط علي ما يحدث بفلسطين .....




هذا هو الواقع المصري من تسعه و عشريــــــــــــن سنه.



و لـــســـــــــــــــــــه



قدامك حل من اتنين .. استمرار السلبيه .. او .. انطلاق الثوره الشعبيه .

عندما تكلمت مع فلسطين


أاااه و أه يا فلسطين .. كم اشتقت اليكي يا أرض الانبياء و المرسلين

أاااه و أه يا فلسطين .. يناديني النضال و قد مرت السنين

أاااه و أه يا فلسطين .. اني بريء من تواطؤ المقربين

أاااه و أه يا فلسطين .. انتي موطني و يقال اني من اللاجئين

أاااه و أه يا فلسطين .. حزين انا و القدس في خطر مبين

أااه و أه يا فلسطين .. وانتي في ايدي الخائنين .. يتاجرون بك يسارا و يمين

أااه و أه يا فلسطين .. وعقلي لايري سوي الدفاع عن الارض و الطين .. طين المزارعين .. و ارض المقدسيين

أااه و أه يا فلسطين .. سأرجع الي القدس و الخليل و جنين



عندما تكلمت مع فلسطين ..

عبدالرحمن





جـــــــدار العـــــار .. جــــــدار الفصـــل العنصــــري الجديــــد بين مصر و قطاع غزه ..المحـــــــــاصر.

الأربعاء، 3 مارس، 2010

الحرم الابراهيمي


الحرم الابراهيمي بعد ضمه لقائمة الاثار اليهوديه .. وهذا مشهد لجنود الاحتلال الصهيوني بداخل الحرم .

ايــــــــــن انتم يا عــــــرب ؟؟!


الاثنين، 1 مارس، 2010

ريحه فســـاد

ريحه فساد مفحفحه والكل شاممها ,, والكل ساكت .!! ماتفهمش ساكت علي ايه ومن ايه ؟؟ من امن الدوله مثلا ؟ طب و ايه يعني ما احنا اساس الدوله !! ايوا احنا الاساس و هما لازم يشوفوا احنا بنعاني من ايه ؟
اكياس دم فاسده وزياده اسعار وقانون ضرايب عقاريه و بلطجه رجال الاعمال و النواب و تقييد للحريات والمعتقدات بشكل عام وسيطره حزب واحد علي البلد من تمانيه و عشرين سنه .. ولســــه !

التعليم العالي و الواطي بقوا في الطراوه والطلبه في التوهان والدكاتره فاتحيين التكييف في العربيات ومش هاممهم تخرب الجامعه باللي فيها .!!
فين زمان وفين ايام زمان وشجاعه رجاله و ستات زمان ؟؟؟؟؟؟؟
انتوا عارفين ليه احنا مستوانا في النازل ؟ عشان اللي ماسكين البلد عمرهم ما فكروا في مصلحه البلد , مصلحتي اولا و ..ام الباقي !

كل اما بشوف برنامج في التليفزيون عن احوال الشباب يكون عن سوء احوالهم وعدم انتمائهم و اللا مبالاه !! يعني هوا احنا اللي عاوزين نبقي كده ؟ اكيد لأ ,امال ايه ؟ اكيد في غلط و الغلط ده انا شايف و مقتنع مليون في الميه انه في السياسه التعليميه بشكل عام .

دلوقتي لأ يجي من خمستاشر سنه كده او اكتر طبعا والتعليم و المدرسين والمدراء والوزارات التعليميه حالفين انهم مش هيدرسوا كويس للطلبه !!!! ايه الكلام ده ؟ اقولك انا ايه الدليل :
كله طبعا عارف ان المدرسه يعني الطابور و الشنطه التقيله والمدرس الرخم ابو شنب و عصايه , المهم نخش الفصل و المدرس يعاكس المدرسه و يخش الفصل بعدينا بربع او نص ساعه ويبتدي اليوم بقي .
المدرس :س: حافظ ولا فاهم ؟ الطالب: فاهم . المدرس :اطلع بره .
المدرس تاني : حافظ ولا فاهم ؟ حافظ . سمع اللي انت حافظه !!
تاني حاجه :كلنا طبعا عارفين ان حصه الدين بتبقي هرجشه و مليطه ومفيش حاجه كنا بندرسها و امتحان اخر السنه الطلبه فيه بتغش من المصاحف !! تخيل انت كده في عقلك لما تغش من المصحف !! يعني ماسك كتاب ربنا وبتغش منه !! والمراقبين قصدي الناضورجيه بيقولوا لنا في اللجنه غشوا بس بصوت واطي !! حصل و بيحصل ولا لأ ؟ حصل و بيحصل .
عاوز بعد كده الطلبه تبقي عامله ازاي وتفكيرها يبقي عامل ازاي ؟؟؟ منيل طبعا ويجوا في الاخر يتهمونا بعدم الانتماء .

بس الحمدلله يا عم انا بحب بلدي اوي واتمني اموت فداء ليها .
بس بكره الحكومه وبكره اللي عين الحكومه , يلعن ابو الحكومه .!!

عارف ليه يلعن ابو الحكومه؟ عشان انا و انت و ابويا وامي و ابوك وامك و جارك وجاري وقرايبي و قرايبك قصدي الشعب المصري عمرنا ماشوفنا من الحكومه حاجه تنسي عالاقل متاعب الدنيا ولا حتي اي حاجه تخلينا نشيل حاله عدم الثقه في الحكومه اللي مش مفارقانا ابدا . مش بقولك يلعن ابو الحكومه !!

وللرغي بقيه ..!!

البدايه .. من هنا الجزء التاني

النهارده 1 مارس سنه 2010 والقدس في خطر.. والعرب لسه نايمين.

كان اخر حاجه كتبتها في الجزء الاول اللي هوا كان من شويه عن عدم اتجاهنا لغزه للمسانده في فك الحصار عنها والموضوع باظ بسبب تسلط وخيانه جهاز امن الدوله للمصريين .
ودلوقتي او من كام يوم اعلنت سلطات الاحتلال انها قررت تضم الحرم الابراهيمي و مسجد بلال لقائمه الاثار اليهوديه , والوضع في القدس و الخليل غير مستقر بالمره اعتقالات و اطلاق غازات سامه علي الفلسطينيين المرابطين في الحرم القدسي و مدينه القدس و الحرم الابراهيمي
والعرب لسا برضو نايميين !! هوا احنا هانقوم من النوم ده امتي ولا احنا عارفين ان احنا نايمين ومطنشين ولا طنط امريكا واقفه علي بابنا و ماسكه العصايه ل اللي هايقوم من النوم !!
بس مصر ناموسيتها كحلي .!! وخيبه حاكمها بني .!! و خيانته هوا وكل الزعماء العرب خيانه معروفه و مكشوفه للجميع ولو الواحد فتح بقه بكلمه ولا حب يساند اهل فلسطين يلاقي قدامه عباره بالبنط العريض مكتوب عليها السياده العليا و الامن القومي !! ايه سفن ايه .

طب الحكام دول هايفضلوا نايمين برضو لو المسجد الاقصي اتهدم و اتبني بداله الهيكل المزعوم !! علي ما اظن انهم ممكن يقوموا علي صوت الرزع و التكسير في المسجد الاقصي وبعد شربه ميه هايقولوا نشجب التصرف الاسرائيلي او ندين بشده القرار الاسرائيلي !!
وبعد كده كل جحش هايرجع علي سريره يكمل نوم .
عارفين ليه كل ده عشان احنا العرب معندناش غير الكلام الماسخ و الشجب و الادانه .

فــيـــــــــــــــــن العـــــــــــــرب؟؟ طلبه الاجابه طنطا .

البدايه .. من هنا

البدايه من هنا , هذا هو ما اعرفه وهذا هو ما اؤمن به ايمانا لا رجعه فيه .
انا مسلم عربي مصري , قبل اما ادخل في المواضيع و القضايا المهمه اللي مؤمنين بالدفاع عنها, احب اقول سبب التدوين اصلا وهو ان ده المكان الوحيد اللي اقدر اقول فيه كل حاجه انا عاوز اقولها بصراحه سواء عن حالي او حال اصحابي او حال مصر عامه و فلسطين وكل حاجه بتكلم فيها يوميا .. هاقول اللي انا عاوزه من غير خوف عشان كده ان سمتها ((حريه ..ممكن ))

المدونه دي ممكن تعتبروها كده كلام مواطن و رأيه في كل المجالات وكل حاجه حوالينا (سياسيه-دينيه-ثقافيه-اجتماعيه-اقتصاديه)
كوكتيل زي مابيقولوا !!
بس اكتريه الكلام هايكون سياسي حبتين
ابتدي بقي احكيلكوا الحكايه :
من وانا صغير وانا بحب التاريخ وعمري ما حبيت حاجه قد التاريخ , وابتدي موضوع الكلام في السياسه من وانا في تانيه اعدادي ايام الانتفاضه التانيه وكنت متغاظ اوي من اللي بيحصل في فلسطين وكل اصحابي في المدرسه كانوا زيي بالظبط مخنوقين من الوضع في فلسطين ومن صمت البلاد العربيه ف قررنا اننا ننظم مظاهره بعد المدرسه .
المهم اتفقنا ان كل واحد فينا مكلف بحاجه يجيبها ,, اللي يجيب قماش و اللي يجيب الوان و اللي يجيب بنزين عشان نولع ف علم الكيان الصهيوني اللي هيا اسرائيل بس انا مابحبش اقول اسرائيل عشان الكلمه دي فيها اعتراف مني بدوله اسرائيل .
المهم كلنا جبنا الحاجات المطلوبه للمظاهره و فعلا نجحت اول مظاهره اشارك في تنظيمها .. بس برضو حسيت بعد كده ان مافيش حاجه شالت الهم من قلوبنا ولسه فلسطين مغتصبه ولسه العرب نايمين و حكامنا منفضين للوضع في فلسطين .
مرت السنين ودخلت الجامعه واصحابي بتوع اعدادي بعدت عنهم بسبب ظروف الدراسه واني روحت عشت في مكان تاني غير الاولاني
و الوضع في فلسطين زي ماهوا ,لسه مغتصبه و منتهكه من الصهاينه وكل بلد عربي في صمت رهيب و حكامنا بيسمعوا كلام طنط امريكا بنت الايه ..!
فرحت اوي لما حصلت الانتخابات في فلسطين لما خرج للنور حكومه الوحده الوطنيه , و قلت هه ,, يالا بقي ابتدينا الطريق الصح , بس يادوب فرحتي ماكملتش و لاقيت ان حكومه الوحده الوطنيه المنتخبه من الشعب الفلسطيني قال ايه سحبوا منها الشرعيه .!! يانهار مش زي بعضه ؟؟! ازاي مش شرعيه اومال الناس اللي راحت الانتخابات دي كانت بتهرج ؟؟!
المهم لسه الوضع في فلسطين زي ماهوا , والمشكله ان فلسطين دي مش اي بلد دي اغلي بلد في قلوبنا و كلنا كعرب مرتبطين بيها ارتباط جامد اوي , ازاي نشوف اللي بيحصل في فلسطين و مانعملش اي حاجه ازاي مش فاهم ؟؟ طب الرؤساء بتوعنا يعملوا حاجه ؟ ولا حاجه بتحصل و اللي يغيظ الواحد مننا , الواحد العربي الحر اللي مايرضاش بالظلم ان كل رئيس عربي بيتباهي بانتماؤه للغرب و امريكا و بيبقي فرحان اوي لما بيستقبل وزير خارجيه اسرائيلي ف بلده !! والله عال علي دي احوال .
قامت الحرب علي غزه قال ايه , حماس بتضرب اسرائيل بالصواريخ !! وحتي لو حماس ضربت اسرائيل بقنبله نوويه اي يعني , مش دوله الكيان الصهيوني دي دوله احتلال و دوله مغتصبه ارض غيرها ,, عاوزين الفلسطينيين يتعاملوا ازاي معاهم ؟؟ يقدمولهم كيك مع الشاي ساعه ضهريه في البلكونه ؟؟!!!!!!
وبعدين طول عمرنا عارفين ان المقاومه بجميع اشكالها مقاومه شرعيه ادامت في سبيل تحرير ارضها والمفروض ان القانون الدولي بيقول كده , بس تقول ايه بقي لما تلاقي ان في صهيونيه منتشره وحكام عرب متعاونيين مع الصهاينه وطنط امريكا ماسكه عصايه العزله والعقوبات لاي دوله تفكر انها تساند المقاومه الفلسطينيه !!
حقيقي حكامنا العرب مافيش اوسخ منهم , مفيش اندل منهم .
مرت سنه علي حرب غزه وعرفت عن طريق ابن الذين اللي اسمه النت ان في مسيره لمسانده غزه والفكره نطت في دماغي من تاني و قعدت احلم بغزه و ترابها !! اه ترابها مش غزه دي في فلسطين يبقي اي حاجه من فلسطين علي عنيا !! دي فلسطين يا بشر .
اقعدت استني لحد اما فتحوا باب الاشتراك في المسيره ويوم اما روحت ادفع الفلوس قابلت شباب زي الفل ,شباب مصري عربي دمه حر مايرضاش بالسكوت عن الحق حتي لو مش حقه بس فلسطين دي حق كل العرب .
المهم و احنا قاعدين لاقينا صدمه زي الفل , قالك امن الدوله سحب الاوتوبيسات ومفيش سفر و محدش هايروح غزه !!!!!!!!
ياليله مش باينلها معالم !!! ازاي دانا كنت هاموت و اروح غزه .المهم قررنا اننا نعتصم في الشارع ونقف في المظاهرات وعملنا كده فعلا , وامن الدوله كل اما يمسك حد فينا يقعدوا يقولولنا امشوا من هنا و الا مستقبلكم هايضيع واحنا اللي هانضيعه و هاتتحبسوا !!!!
طب بالذمه ده كلام ناس مصريين زيك زيهم , والله العظيم كان كل اما ظابط امن دوله يمسكني كان نفسي اقوله ايه سفن ايه !!!!!
__________________________________________________________________
ده جزء رقم واحد عن البدايه .. من هنا ولسه في اجزاء تانيه قدام
__________________________________

انا حاسس ان اي حد ممكن يمل مني و من كتابتي بس هاعمل ايه بقي هوا ده الواقع