الأحد، 9 أكتوبر 2011

جمعة إنقاذ الشباب

ساعات كتير بحس و انا راكب المترو ولا اي مواصلة جماعية ان في عيون كتير عليا ,, بحس اني متراقب كتير ,, مش نفخ ف نفسي ولا غرور و اني مهم ,, بس بحس دا اكتر عشان انا شاب ...
بحس ان العين دلوقتي علي الشباب ,, في رصد و متابعة للشباب .. تصرفاتهم .. كلامهم .. فكرهم .. احتياجاتهم .. و ساعات اكتر و هوا دا سبب التدوينه اني بحس اننا مضطهدين في المجتمع !!
كتير اوي بيتبص لنا علي اننا عناصر مشبوهة .. مثيرين للشكوك .. مخربين .. معندناش انتماء .. و ساعات كتير ناس بتشطح ف دماغها و تقول علينا جواسيس و ماسونيين !! حبيب قلبي يا منحنح بجد !!
ليه مفيش اي دعم من اي جهة في البلد دي ؟؟ ليه مفيش اي حد ف اي حتة مستعد انه يدينا الثقة و يعتمد علينا ؟؟ طب ليه مش عاوزين مثلا يستفيدوا من عددنا و يعمروا الصحرا ,, سينا ,, السنغال ,, اي حتة يعني ,, واهو يكسبوا فينا ثواب ....

طب ليه معظم الشباب المتعلم لما بيجي يشتغل , بيروح علي مكان مش تخصصه ؟؟ و انه دايما الظروف و التعليم و البطالة و الماديات بتبقي السبب في كدا ؟؟؟؟؟؟ ليه مفيش مواجهة ؟؟ ليه مفيش مساعدة ؟؟؟ ليه مفيش مبادرة لتقبل وجودنا و الاستفادة مننا ؟؟؟؟ ليه محدش بيقعد معانا و يسمع لنا و يسمع مننا ؟؟؟؟؟؟؟

مش عاوز اكرر الكلام اللي قلته قبل كدا اللي كان عن مشكلات الثقافة الأسرية و ارتباك النسق الاسري و الشباب اللي بيسعي انه يتجوز و يحقق اللي بيحلم بيه ... مش عاوز اكرر بس دا فعلا موجود و حقيقي ....
لو حد فيكو ركز هيلاقي انه في كل مجالات الحياة في تربص بالشباب و تقليل منهم و قتلهم معنويا ,, في دايما و غالبا تحطيم لكل اللي بيحلم بيه الشباب و عاوزين يحققوه .. ودا شامل كل من النشاط السياسي ,, الثقافه ,, الفنون ,, الاسرة و الاجتماعيات ,, التعليم و مجالات العمل المختلفة !! طب علي فكرة احنا بالشكل ده هننقرض !!!!!!!

مش عارف بس انا عن نفسي و كعبدالرحمن ,, حاسس بكدا ,, ويمكن اللي خلاني اشوف و اركز مع الموضوع ده هو ان عندي مشكلة اجتماعية بحتة متعلقة بموروثات عائلية و اسرية قديمة هيا اللي عاملة المشكلة دي .... ودا اللي خلاني اسأل : ياتري كام واحد و واحدة من الشباب عندهم احلام بتتصدم في وساخة الواقع و بتموت في ثواني لمجرد انه الحلم مش علي هوا ناس تانيه !! كام واحد فينا كان عنده حلم و مات ؟؟؟؟؟؟؟

انا مثلا عندي 24 سنه و لما جيت افكر في جواز لقيت ان كل حاجة و كل حد و كل الظروف مش بتساعد ولا في باب امل واحد مفتوح مع اني مؤمن بالأمل و اصراري ده نابع من اقتناعي بوجود الامل ..!
مش عارف مين بالظبط و ليه بالظبط ممكن ان حد يستريح لما يشوفنا ميتين ,, و الانحراف و اللامبالاة اقرب طريق لينا ,, مش بهدد اننا لو معملناش اللي في دماغنا هننحرف ,, بس في شباب فعلا بيفقدوا الامل من كتر سواد الواقع ,,

يا جدعان مش كدااااا ..

طب احنا كشباب لما نقضيها تنفيض و ضرب و حشيش و حركات مايبقاش عاجب حد ,, و لما نهتم و نبدأ نبص علي بلدنا و مجتمعنا و نهتم بالتنوير و الثقافة و التوعية مايبقاش عاجب حد برضو .. طب حد ده بيعجبه ايه بالظبط ؟؟؟؟؟

يا جدعان .. يا حد .. يا ايها الآباء .. يا ايها الأمهات .. بجد اسمعوا لينا ,, ادونا الثقة ,, شوفونا بئا ,, والله ما هتندموا ,, احنا مش بنطلب حاجه عيب ,, احنا بنطلب الرحمة ,, و ربنا بيرحم ,, ف احنا البشر مش هنرحم !!! ماتجيش

حقوقنا مش هنطلبها منكم ,, احنا هناخدها بالعافية و نثبت نفسينا بالعافية لو الزوق مش نافع ,, و اعرفوا بس عشان لو مش عارفين و حاطين مكان المعرفة شوية معتقدات و تقاليد عفي عليها الزمن .. انه تقدم و ارتقاء اي مجتمع مربوط بتقدم و ارتقاء الشباب في المجتمع ده ,, و تقدم و ارتقاء الشباب مربوط بالحالة النفسية و الدعم المعنوي لافكار و احلام و طموحات الشباب ده ,,,,, اتمني ان حد يفهم ,,,,

الثلاثاء، 27 سبتمبر 2011

سلطوية الأسرة داخل مجتمعنا الثوري

تتخذ الأسرة في عالمنا مكانة متميزة عبر التاريخ ,, فلها قدسيتها و شأنها في الحياة المجتمعية كما في التأثير علي أعضاء الاسرة بشكل عام و مباشر ولا احد ينكر دور الأسرة في تقييم أفرادها ايجابيا -في معظم الاحوال-ولكن الذي جعلني أكتب عن سلطوية الأسرة هو إيماني بأن تلك السلطوية ما هي الا أحد الأسباب المباشرة في التخلف الأسري -
....
فجميعنا يعلم و قد عايش البعض منا ما يعرف بسلطوية الأسرة و تأثيرها علي الأبناء-باقي اعضاء الاسرة- وانا لا اعني بكلمة الابناء من هم صغيري السن ولكني أتحدث عن كل شخص قد تجاوز سن الرشد القانونية فحين يكمل الفرد عامه الحادي و العشرين يكون قد بلغ مكانة لا بأس بها من حيث التفكير العقلي و الموضوعي أي انه قد وصل الي مرحلة الإعتماد علي إعمال العقل البشري
اما ما يدعو لإنتقاد الأسرة هو تحكمها المستمر في أفرادها من الشباب و التصرف في شئون مصيرية و أمور مستقبلية دون مراعاة ماذا يدور بعقل هؤلاء الشباب ,, هذا بالإضافة الي تعمد تكرار تابوهات سلفا مثل ( نحن الأكثر دراية بمصلحتكم - أنتم لا تعرفون شيئا - اننا لم نخلفكم حتي يأتي ذلك اليوم الذي تعصون فيه أوامرنا - و قد تصل بعض الردود و المهاترات الي ( اما هذا و اما اخبطوا دماغكم في اقرب حيطة!!! )

اما بالنسبة لموضوع الزواج فهنالك مأساة تتكرر في كل منزل بداخله شاب أو فتاة وذلك حين يفكر الأهل في موضوع الزواج بشكل مادي بحت .. فيتم إتخاذ الزواج علي أنه ( شقة - شبكة - ستاير و صالون - انتريه و تليفزيون - و طبعا فرح لازم البلد كلها تحكي عنه!! ) ولا يتم احتساب أننا بشر ... بل هناك بعض الأسر التي تفكر بشكل رأسمالي بحت و يعتبروا أن الأزمة الإقتصادية العالمية تؤثر بشكل او بآخر علي تواجد و إستيفاء كل هذه الشروط التعجيزية .. فإما أن يتواجد كل ذلك .. و إما أن يكون الرفض,, فهو أسهل طريق لكل من يفكر بشكل نفعي في موضوع الزواج .....!!
و هنا اتسائل و أوجه سؤالي الي الآباء و الأمهات : لماذا لا تعيرونا أي إهتمام ؟؟ أتعتقدون أن تساهلكم معنا سيقلل من شأنكم ؟؟ ألا تشعروا بما نمر به ؟؟ أمازلتم ترونا صغار ؟؟

إنني مقتنع تمام الاقتناع بأننا نأخذ بآرائكم و نهتم لمشورتكم احتراما و تقديرا لكم و لأننا نعرف تماما معني احترام الوالدين و أهميتكم في حياتنا ولكن هل تقابلوا تقديرنا لكم بعدم التقدير ؟؟؟؟ بعدم تقديرنا و إلغاء عقولنا و كسر إرادتنا و إختيارنا ؟؟؟؟ أهذا هو المقابل ايها الآباء و الأمهات ؟؟؟؟؟

لقد أنعم الله علي الانسان بنعمة العقل .. ليفكر و يتأمل في هذا الكون و يتعلم و ينتج منه .. كما كان من أهم اسباب وجود العقل البشري هو إعمال العقل في التفكير لمستقبل افضل وحياة أرقي للانسان .. المهم أن الهدف هو إعمال العقل ..... فأين هو المنطق و العقلانية حينما تصدروا قراركمن بأننا غير مؤهلين لإستخدام العقل بل و كثير منكم يستخدم فزاعات أسرية مهينة مثل فزاعة الوصاية و عدم معرفة المستقبل و فزاعة التقاليد و فزاعة عدم الرضا عنا !! وفي الزواج تقومون بإستخدام فزاعة العنوسة و القول بأنه إذا استخدمنا عقولنا و أرادنا التصرف فيما يخصنا كما نري ,, فإن التعاسة و الفشل سيكونوا مصيرنا ,, و أننا سنشقي طوال حياتنا .!!!!!

لماذا كل هذا التشاؤم ؟؟؟؟؟؟

و اخيرا و ليس بآخر .. أريد أن يعلم كل أب و أم أنه حين تقرروا إعطائنا حرية التصرف فيما يخصنا و قمتم بدعمنا و كان مصيرنا هو الفشل فإعلموا جيدا أننا علي إقتناع تام بأن ذلك هو قدرنا لأنه اختيارنا .... أما إذا قررتم الإستمرار في تسلطكم و إحكام قبضتكم علينا و كان مصيرنا هو الفشل .. فإعلموا أننا لن نوجه اللوم الا لكم لأن ذلك الفشل هو نتاج لإختياركم أنتم .........

رسالة الي كل شاب و فتاة عندهم احلام : ولا بد .. يبقي المصير في اليد ........

الاثنين، 26 سبتمبر 2011

التخلف الاسري .. التعريفات و الاسباب

بداية احب ان اعرف كل من سيقرأ هذه التدوينة و التدوينات القادمة بأن السبب الرئيسي الذي جعلني اهتم بمناقشة موضوع التخلف الاسري و الاسهام في تحليل هذه الظاهرة و التعرف علي اسبابها و انتشارها و تقديم ابسط الحلول للخروج من هذا النفق المظلم ,, هو انني قد واجهت مشكلة معينة كان من اهم اسباب حدوثها هو التخلف الاسري ..... هذا بالإضافة اللي مجال تخصصي وهو البحث الاجتماعي .

التخلف الاسري :

1 - التعريفات :-

أ - هو فقدان الفرد لدوره الاساسي و الطبيعي داخل منظومة الأسرة .
ب - هو الإختلاف و التباين في الأدوار الأسرية و الجهل بكيفية آدائها .
ج - هو ممارسة الإحكام و الضغط السلبي علي أفراد الأسرة , و عادة ترجع ممارسة الإحكام و الضغط السلبي الي الآباء و الأمهات نظرا لأدوارهم المحورية في المنظومة الأسرية .
د - هو تسلط أي فرد أو أكثر علي باقي أفراد الأسرة و القيام بالتحكم و إصدار القرارت في مواضيع و أمور مصيرية و قد تكون مستقبلية تخص الأفراد دون الرجوع اليهم .


كما ان هناك الكثير من التعريفات الاخري لمفهوم التخلف الاسري ....

2 - الاسباب :-

أ - عدم استقلالية كل فرد بدوره الوظيفي داخل المنظومة الاسرية
ب - عدم نشر ثقافة الاعتماد علي النفس و إعمال العقل .
ج- التمييز ضد المرأة .
د - التقليل من شأن الأفراد داخل الأسرة و خاصة الأفراد الشبابية و صغار السن .
ذ - استخدام الفزاعات الأسرية مثل ( العنوسة - الفشل المستقبلي - الخروج عن طاعة الآباء و الامهات - الحرمان من الميراث - نبذ الفرد و تحقيره - العقاب الجسدي )
ر - سلطوية الآباء و الأمهات بإعتبارهم الكيانات الرئيسية داخل النسق الأسري .

كما أن هناك الكثير من أسباب التخلف الأسري .....


الثورة علي التخلف الأسري

الثورة علي التخلف الأسري هي مجموعة تدوينات سوف اقوم بكتابتها و نشرها بصفة مستمرة ,, و أناقش في هذه التدوينات,تعريفات التخلف الأسري و اسباب تفشي الظاهرة -موضوع البحث و التدوين- في مجتمعنا المصري و كيفية مواجهة هذه الظاهرة الإجتماعية و الحد من انتشارها .

*** أرجو من السادة الأفاضل الذين سيقومون بزيارة هذه المدونه ان تنشارك جميعا من خلال المشاركات و التعليقات و ابداء الآراء و تقديم الاقتراحات و عرض للمشكلات المتطابقه للموضوع من اجل القضاء علي هذه الظاهرة .. و أي ظاهرة مجتمعية اخري تؤثر سلبا علي التقدم البشري داخل المجتمعات وتفقد الانسان لآدميته و شعوره الانساني ....

الأحد، 25 سبتمبر 2011

انتو كدا مستريحين يعني ؟؟

الحمدلله عملتوا اللي ف دماغكم ؟؟ مستريحين اوي كدا ؟؟ عاجبكم اللي احنا فيه ده ؟؟؟ هتستريحوا لما تقضوا علينا و تشوفونا بنموت قدامكم ؟؟ اصل انا عاوز افهم سبب اللي بتعملوه ده ؟؟؟؟؟؟؟؟ الضمان بالنسبه لكم كدا ؟؟؟؟ هوا ده الاستقرار في نظركم ؟؟؟؟؟ ليه عاوزيننا نكره حياتنا و اللي احنا فيه ؟؟؟؟ ليه دايما بتكسروا اختيارتنا ؟؟؟؟؟ هوا احنا مش بني آدمين يعني ولا ايه ولا هوا عشان انتوا خلفتونا خلاص بئا استعباد ؟؟؟؟؟؟؟؟؟ ناموا و اطمنوا ... انتوا خلاص قتلتوا الأمل فينا ..! والدمع ساقية كبت ......

الأحد، 18 سبتمبر 2011

تخيلوا معي....

تخيلوا معي ان العشاق الذين ابعدتهم الظروف عن بعضهم البعض و قتلت الدنيا احلامهم ,, مازالوا معا..!
تخيلوا معي ان العادات و التقاليد المجتمعية لاتتدخل في تكوين حياتنا التي نريدها لأنفسنا..!
تخيلوا معي ان الآباء و الأمهات لا يقوموا ببيع اجسادنا مقابل (شبكة - مهر - شقة - مؤخر) و لا يعترضوا رفضنا علي ذلك بمقولة : احنا ادري بمصلحتك!!
تخيلوا معي ان جميع الزيجات التي حدثت حتي الآن هي نتاج لعلاقات عاطفية توجت بالزواج , و لم تكن عن طريق الصالونات و الذي يهدر من كرامة و آدمية الانسان و يجعله (بضاعة) يتم تسويقها .. يأتي من يقدر علي الدفع لمعاينة هذه الـ(البضاعة)..!!!
تخيلوا معي ان الناس تعرف تماما معني الانسانية و تقدرها , و أن عالمنا هذا لا يعرف معني الشر!!

*** تخيلوا معي أننا نعيش بجانب من نحب***

أقول لكم تخيلوا معي لأنني كنت ساذج للدرجة التي جعلتني اعتقد أن هذا العالم يعرف معني الأمل .. و اعتقدت ان هذا العالم قائم بالفعل علي كل ما جعلتكم تتخيلوه ..معي!

اعتقدت انني قادر علي تحقيق أبسط احلامي و ان العالم سيمنحني القدرة و القوة علي تحقيق هذه الاحلام ,, لأنه يعرف انها لم تكن سوي احلام صغيرة .. تستحق الوجود.
و لكن بما أن أبسط احلامنا و اكثرها براءة لا نقدر علي تحقيقها ,, فلماذا وجدت الاحلام في حياتنا من الاساس؟؟؟

و حتي تتحقق أصغر و أبسط احلامنا .. فإنني لن أترك نفسي لهذه الدنيا بأن تقرر لي ماذا أفعل و ماذا أكون !! سأفعل ما أريد و سأكون ما أريد .. لأن الروح التي بداخلي .. لا تعرف الضعف و الاستسلام ......

الثلاثاء، 13 سبتمبر 2011

انني لا أري بينكم شرفاء !!

اولا اريد ان يعلم كل من سيقرأ هذه التدوينه و يعطي لها بعض من وقته, ان يعلم بأنها لن تكون التدوينه الاخيرة في انتقادي للمجلس الاعلي للقوات المسلحه ,,

لقد جاء المجلس العسكري الي السلطه في مصر وهو يحدثنا عن حمايته للثورة المصرية و اقتناعه بمطالبها واعطي لنا الوعود البراقه بأنه علي رأس السلطه تحقيقا لهذه المطالب الثورية ,, ولكن طيلة فترة وجود المجلس العسكري علي رأس السلطه و حتي الآن و نحن لا نري الا تواطؤ فظيع و مماطلة غير مفهومة في تحقيق مطالب الثورة التي تعتبر مطالب الشعب ,,

فقد اقر المجلس علينا استفتاء شعبي علي بعض المواد التي وردت في دستور 71 وهو يعلم تماما بأن الذي حدث في ميدان التحرير هي ثورة وان الثورة لا تقبل بمثل هذا الدستور اطلاقا ولا تقبل بترقيعه مرة اخرة , و مع ذلك ذهب جميع المصريون الي صناديق الاقتراع املا في الديمقراطيه الكامله و بغض النظر عن نتيجة الاستفتاء , فقد خرج المجلس علينا جميعا يسارا و يمينا بالإعلان الدستوري والذي ألغي بدوره نتيجة الاستفتاء ....

ثم جاءت بيانات المجلس العسكري التي تحمل عبارات التهديد و كأن المصريين هم انصاف مواطنين وليس لهم الحق في تقرير مصيرهم !! و اختصارا لتاريخ المجلس العسكري في حكمه للبلاد فقد اشاع المجلس في الاعلام المصري-الذي لم تصل اليه الثورة بعد- بأن هناك العديد من المؤامرات الخطيرة التي تحيط بأمن مصر القومي !! وقد اختصر المجلس الطريق و قال ان هناك العديد من منظمات المجتمع المدني و الحركات السياسية التي تتلقي تمويلا خارجيا و الذي بدوره يتضمن توجيها لسياسات هذه المنظمات و الكيانات السياسية وان ذلك يعتبر تدخلا في شئون مصر و من شأنه الاضرار بالعملية الديمقراطيه !!!!


هنا اقف قليلا,, لأني اريد توجيه سؤال او أكثر الي هذا المجلس الذي يعتبرنا مختلين عقليا ,, كلنا نعرف ان الجيش المصري يحصل علي معونات عسكرية و مالية من الولايات المتحده الامريكية ,, أليست هذه المعونات تعتبر تمويلا خارجيا ؟؟ أليس من حق عقولنا البسيطه ان تشكك في نوايا هذه التمويلات خصوصا و انها لأكبر مؤسسة في هذا البلد ؟؟؟؟؟ الا يمكن لنا نعتقد ان وراء هذا التمويل الضخم تحكم في سياسات بلدنا و كيف نديرها ؟؟؟؟؟؟ الا يمكن لنا ان نعتقد انه في مقابل هذا التمويل ,, ما يملي علي قادتنا ,, كيف يحكموا هذا البلد و كيف تكون علاقاتنا الخارجيه و مع من نتحالف و مع من نغلق ابواب التفاهم ,, لمجرد انهم مخالفين لسياسات الجهة المانحه للتمويل ,, امريكا !!

الا يري المجلس بأن تمويل الجيش المصري و المؤسسة العسكرية خطر اكبر من خطر التمويل المقدم لبعض منظمات المجتمع المدني ؟؟

يتكلم المجلس احيانا و ينوه بأن هذه الكيانات و المنظمات الحقوقيه تأخذ تمويلا خارجيا ,, فهل عرضت الدولة تمويلا و هذه الكيانات رفضت ؟؟ ام ان المجلس العسكري يري انه حين تمول الدولة منظمات مجتمعها المدني ,, سوف تقوم هذه المنظمات و الكيانات بكشف الحقائق و رصد الانتهاكات التي يمارسها مجلس عسكري لايفهم في السياسه قدر ما يفهم في المحاكمات العسكرية و حكومة لا تقدم اية حلول ولا تقبل بما نقدمه من حلول وترغب في مزيد من البقاء علي كرسي الوزارة ؟؟؟؟

هذا فيما يخص قضية التمويل الخارجي ,, اما فيما يخص احداث اقتحام السفارة الاسرائيلة و ما حدث من اعمال عنف ,, فهل المجلس العسكري و الحكومه لم يصل اليهما أنه كان تفاديا لكل هذه الاحداث و تفاديا لمشاعر شعب مصر ,, كان من الممكن ان يطردوا السفير الصهيوني ؟؟؟؟ لماذا لم يتم طرد السفير الصهيوني منذ بداية الاحداث ؟؟؟؟ هل ما حدث عند مقر السفارة و امام مديرية امن الجيزة كان مرتب له ام ماذا ؟؟؟؟؟ اليس كل ذلك يثير التساؤلات ؟؟؟؟؟ ايها المجلس العسكري ,, ماذا تريد منا ؟؟ ماذا تريد من ثورتنا ؟؟ هل تريد الانقلاب عليها ؟؟؟ ام انك وضعت بالفعل سيناريو مخصص للسنوات القادمه ؟؟؟ هل ستأتي لنا ايها المجلس بحكومة و رئيس ديكور و انتم ستكونوا خلف الستار تفعلون ما تريدون ,, تتحكموا في شعبنا كما تريدون و الاسم ان في حكومة و رئيس !! ام ما الذي تخططوا له؟؟؟؟؟

تقولون دائما ان من بين الثوار هناك اشخاص غير شرفاء يفعلون دائما ما يخدم مصالحهم ,,,,, أليس ما تفعلوه انتم اعضاء المجلس العسكري هوا بالفعل ما يخدم مصالحكم وليس لصالح هذا الشعب و هذا الوطن ؟؟؟؟؟ و هل ما تفعلوه يوجد به ذرة كرامة او شرف ؟؟؟؟
متي ستحدد ايها المجلس ؟؟؟؟ هل ستعمل لمصالحك الشخصيه و تركع لمن يضمن بقاؤك في السلطه ,, ام انك ستعمل علي كرامة هذا الوطن ؟؟؟؟؟ ايا كانت اجابتك ,, فأنا لا أري بينكم شرفاء ..!!!

الثلاثاء، 23 أغسطس 2011

عن محاكمة الفرعون .. أتحدث


* مبارك في القفص .. الحمدلله !

* كلنا شوفنا محاكمة مبارك و عياله , و العادلي و كلابه .. و للأسف لما شوفنا الفرق بين محامين الدفاع و محامين اهالي الشهداء و مصابي الثورة , اكيد كل واحد فينا شخر في سره بعد اما حس بالفرق الشاسع بين كلا الفريقين و كأنهم فريق البرازيل و فريق جيس اسماعيلية ..!
و لو باقي الجلسات فضلت بالشكل و الفرق ده .. مبارك و حاشيته هايطلعوا براءة و الشعب كله هايتحبس ..!

* السؤال هنا : لماذا لم يتم تقديم جميع اشكال الدعم لمحامين اهالي و اسر الشهداء و مصابي الثورة ؟؟ بحيث انه يكون كل الكلام موجه في إطار واحد الهدف منه محاكمه عادلة لكل المسؤلين عن قتل الشهداء .. انما مش كل محامي يطلع يهرس و يعمل لنفسه الشو الاعلامي اللطيف ..!
و بعدين فين المنظمات الحقوقية ؟؟؟؟؟؟؟

* ازاي المنظمات الحقوقية المصرية لم تقم بأي نوع من المبادرات للإجتماع بمحامين اهالي و اسر الشهداء و كل النشطاء الحقوقيون اللي كانوا بيرصدوا جرائم التعذيب في عهد الطاغية مبارك ؟؟
* عموما احنا نأمل انه مايكونش في تهريج ف حق الشهداء اللي جابوا كرامتنا و حريتنا و اللي اكيد ماينفعش ان ده يكون رد الجميل ليهم .
* اخر حاجة هيا رسالة الي كل المنظمات الحقوقية و مراكز مناهضة التعذيب و الي كل النشطاء الحقوقيين في مصر :- عليكم بتقديم التنازلات و السعي في الوقوف بجانب محامين الإدعاء بالحق المدني في قضية محاكمة مبارك و نظامه الفاسد والا فلن يكون لكم بيننا اي مصداقية و ستلحقوا بالنشاط الحقوقي في مصر اكبر وصمة عار .. و حينها سنكتفي بوضعكم في خانة الثورة المضادة .. لثورتنا .!!

الخميس، 28 يوليو 2011

المجلس العسكري .. خط احمر !!

انا عاوز افهم حاجه واحده بس : ياتري المجلس العسكري .. خط احمر ولا خط بارليف .. ولا خط بيزنس ؟؟؟؟

الصورة دي توضح مفهومي لسياسات المجلس العسكري .. خط حلوان المرج !!


الاثنين، 20 يونيو 2011

انا متحرش جنسيا .. إذن انا وسخ شخصيا endSH#

و انا ليه أعاكس بنت في الشارع ؟؟ فيها ايه لما أمشي بإحترامي و أحترم اللي حواليا ؟؟؟ مش مستني حاجه منهم بس انا متربي علي كدا !! وبعدين يعني هاحس ب أيه لما أقول كلمة وسخة لواحدة ولا لما عاكسها ولا لما أحط ايدي بالعافيه علي جسمها ؟؟ هاحس ب أيه؟؟ رجولتي هتزيد ؟؟ هتأكد منها ؟؟ أبدا !! كل ما في الحكاية اني هابقي في نظر نفسي قبل ما ابقي في نظر الناس .. شخصية وسخه و ضعيفة .. مش محترم .. و صفات تانيه الواحد يخجل منها !!

يبقي ليه بقي ؟؟و بعدين هوا انا مقطوع من شجرة ؟؟ ولا معنديش بنات في العيلة ؟؟ بالعكس .. عندي اخواتي و امي و قرايبي و قريب هايبقي ليا بناتي !! طب انا أضمن منين ان محدش يتحرش بيهم و انا اصلا بتحرش بدبان وشي !! يبقي المفروض عشان أضمن حماية بناتي و اخواتي لازم اضمن للناس حماية بناتهم و اخواتهم .....

التحرش الجنسي دا ضعف .. ياريت تعالجوا نفسكم من الضعف ده .. احنا عملنا ثورة ضد كل أشكال الفساد .. و التحرش الجنسي شكل من أشكال الفساد .. فساد أخلاقي .. ازاي هانبني مجتمع جديد و متحضر و احنا لسه بنمارس عادات وسخه مع نفسنا .. خليك إيجابي .. البنت اللي هاتتحرش بيها احتمال كبير تطلع اخت شهيد من شهداء الثورة .. عارفهم ؟؟ دول اللي ماتوا عشان احنا نعيش .. يبقي دا رد المعروف ليهم ؟؟ اكيد مش دي اخلاقنا .!!

انا راجل .. انا مصري .. انا ضد التحرش الجنسي بكل أشكاله .. و انتوا كمان هاتبقوا ضد التحرش الجنسي و هاتمنعوه بنفسكم !!

الأربعاء، 1 يونيو 2011

رسالة للمجلس العسكري .. انا مواطن مصري ومن حقي انتقدك


في يوم التدوين المصري ضد سياسات المجلس العسكري , أحب أقول تاني للمجلس العسكري و للمؤسسة العسكرية انه 25 يناير دي ثورة شعب مش إنقلاب عسكري ..!
بفكركم بالكلام ده عشان تعملوا اللي عايزه الشعب مش اللي يتوافق مع سياستكم و طريقة إدارتكم للبلاد . و عشان تعرفوا إننا كشعب عارفين ان اللي حصل في 23 يوليو 25 كان إنقلاب عسكري مش ثورة زي مانتوا بتحاولوا تفهمونا .. وزي ما نظام مبارك و اللي قبليه و اللي قبليه كانوا بيعلموه للناس في الكتب و في المدارس .. في الشوارع وفي البيوت ...

انهارده 1-6-2011 ودا اليوم اللي اتفق فيه كل المدونين المصريين الشرفــــاء انهم يوجهوا رسالة إنتقاد للمجلس العسكري و سياساته الغير مفهومة .. و انا بكتب دلوقتي عن أسباب تخليني انتقد طريقة إدارتكم لمصر ...

1- متعلق بالإستفتاء و الإعلان الدستوري :

**حالة إستغراب ** إزاي المجلس العسكري بعد ما شاف ثورة 25 يناير ومدي قوتها و شرعيتها , يدعي المصريين للإستفتاء علي مجموعة مواد دستورية من دستور 71 .. اللي هوا اصلا فقد شرعيته بفعل الثورة المصرية ؟؟؟؟؟؟؟؟

إزاي بعد إعلان نتيجة الإستفتاء , يجي المجلس العسكري المقر و يعمل حاجة كدا اسمها الاعلان الدستوري المكون من 60 مادة ولا 62 مادة , ومايكونش للإعلان الدستوري ده أي علاقة بالإستفتاء الأولانييييي ؟؟؟؟؟؟؟! ازاي بئا يعني ؟!!
طب سؤال يطرح نفسه : الاستفتاء اتعمل ليه أصلا ؟؟ ولما اتعمل الاستفتاء كان ايه ضرورة الاعلان الدستوري ؟؟ ومن الأول اصلا بئا هوا ليه إستفتاء و بعدين اعلان دستوري و تعديل مواد من دستور فاقد للشرعية بفعل الثورة ؟؟؟؟؟؟؟ هوا احنا بنضحك علي بعض ولا ايه ؟؟؟؟؟؟؟
طب هيا ثورة ولا انقلاب عسكري ؟؟ انا عارف الاجابة .. المجلس العسكري عارف الاجابة ولا لأ ؟؟؟؟؟

2- متعلق بالمحاكمات العسكرية للمدنيين :

**حالة إستنكار** احنا مواطنين مدنيين ولا لأ ؟؟؟؟ طب مش المفروض انه لما اي مواطن يقوم بعمل يضر بالمصلحة العامة بهدف التخريب , انه يتحاكم أمام المحاكم المدنية الطبيعية ... مش دا المفروض يعني ولا غلط ؟؟؟
طب يبقي ليه نتحاكم امام القضاء العسكري .. هوا احنا عساكر في الجيش ولا احنا ايه ظروفنا ؟؟ هوا احنا في دولة قمعية ولا بوليسية ولا احنا في دولة ديكتاتورية تكم الأفواه ؟؟؟؟
طب إذا كانت الحجة هنا انه المرحلة الحالية لازم لها محاكم عسكرية , إزاي المواطن العادي حتي لو كان بلطجي يتحاكم محاكمة عسكرية , و خونة البلد و اللي علي رأسهم مبارك - اللي كان من المؤسسة العسكرية -يتحاكم محاكمة مدنية ؟؟؟؟؟؟!!!!!!!!!
طب إزاي المواطن وإن كان بلطجي وهوا احتمال يكون مغرر بيه و الفلوس لعبت ف دماغه عشان يقوم بعمل فاسد او تخريبي .. يتحاكم محاكمة عسكرية .. و الناس اللي كانوا حاكمين البلد و أفسدوا فيها فساد شامل و بين و صريح .. يتحاكموا محاكمة مدنية ؟؟؟؟؟؟
*****
هوا مين اللي أخطر من التاني .. البلطجي ولا الحاكم الفاسد و نظامه القمعي ؟؟!

بلاش دي : حاجة تانية .. مش المفروض انه يبقي في عدل في المحاكمات ؟؟؟ يعني يا إما البلطجي و الحاكم الفاسد يتحاكموا أمام محاكم عسكرية .. يا إما الأتنين يتحاكموا أمام محاكم مدنية .....صح يا مجلس ولا لأ ؟؟؟؟!!!!


3- متعلق بإنتقاد المجلس العسكري و المؤسسة العسكرية بشكل عام :

**حالة إستعلاء** ليه المجلس العسكري مبين انه خلاص زهق و اتخنق ومبين ان صبره نفد علينا ؟؟ يعني هاتعمل ايه يعني !! هترجع مبارك للحكم تاني ولا ايه بئا ..! ولا يمكن هتضرب الشعب بالدبابات .!!
مش برضو احنا طلبنا و مازلنا بنطالب بمجلس رئاسي مدني , و المجلس العسكري رفض الكلام ده .. يبقي لازم تستحمل يا مجلس ولا اييييييه ..!

طب ليه المجلس العسكري شايف انه فوق أي نقد و انتقاد ؟؟ هوا المجلس ده مكون من ملايكه معصومة من الخطأ ولا ايه ؟؟! ولا المجلس شايف انه فوق الشعب ولا ايه عايزين نفهم ......

_____________________________________

انا كدا خلصت كل اللي جوايا تجاه المجلس الأعلي للقوات المسلحة بس فاضل كام حاجه كدا :-

** لا يوجد اي سلطة .. أي سلطة فوق النقد حتي لو كانت المؤسسة العسكرية نفسها .. الشعب هو الحاكم وليس المحكوم .!

** الشعب هو الحاكم الفعلي و علي جميع المؤسسات المدنية و العسكريةأن تعمل علي تلبية و تنفيذ جميع متطلبات الشعب .
____________________________________

شكرا 1/6/2011 يوم التدوين ضد سياسات المجلس الأعلي للقوات المسلحة .

السبت، 7 مايو 2011

منشور سبق توزيعه اثناء الثورة المصرية

دي حكاية منشور سياسي كان بيتوزع أثناء الثورة المصرية .. و احنا في الميدان .!! شوفوا الفاسدين و المنتفعين من الفساد ومن النظام البائد كانوا بيقولوا ايه للشعب المصري الغير مسيس .!! و الي نص البتنجان !!

بسم الله الرحمن الرحيم
وبه نستعين
الي شعب مصر المحروسة المخلصين و العاقلين قال الله تعالي ( يا ايها الذين آمنوا أن جاءكم فاسق بنبأ فتبينوا أن تصيبوا قوما بجهالة فتصبحوا علي ما فعلتم نادمين ) و قال الله تعالي (أن ينصركم الله فلا غالب لكم وأن يخذلكم فمن ذا الذي ينصركم من بعده و علي الله فليتوكل المؤمنون)

إخواننا و اخواتنا الاعزاء بعد التحية و السلام

اولا : نشكر شعب مصر بجميع طوائفه الذين قاموا بتلك الإنتفاضه لمواجهة الفساد بكل انواعه .

ثانيا : ارجو الا يأخذنا العداء تجاه رجال الشرطه لأنهم من ابناء مصر مثلنا تماما وما فعلوه كان فقط تنفيذا للاوامر لأن هذا دورهم فنرجو المصالحه بين الشعب و الشرطه .

(خد بالك بئا من النقطه اللي جايه نيااهااع)

رابعا : الانتفاضه الشعبية حققت اكثر من 80% من اهدافها و ليس اهداف اي قوي خارجيه او اهداف اي حزب بل حققنا مالم يتصوره العالم و الآن كلنا فداء تراب مصر فنرجو ان يكتفي المتظاهرون الي هذا الحد من التظاهر و ان نعطي فرصه للاصلاح حتي نستطيع تعيين اناس محترمين ليس لهم مصالح سياسيه لمتابعة مصالح الشعب و ليس مصالح شخصيه فارجو الانسحاب من ميدان التحرير و رجوع كل الشعب بكل طوائفه الي منطقته و اختيار من يمثلهم لمتابعة مصالح الشعب بعيدا عن المناصب السياسيه و المتملقين الذين ينحصر دورهم في الوصول الي المناصب العليا فقط دون النظر الي مصلحة الشعب فنحن من هذه الورقه (المعبرة عن مصلحة الشعب) دون غيره نحيي (سيادة الأب والقدوة و المثال و الرمز السيد الرئيس / محمد حسني مبارك ) علي ما قدمه و يقدمه لشعبنا العظيم .

نعتقد ان صورتنا وصلت الي العالم كله وليس سيادة الرئيس فقط هذا وقت ملاحقة الفساد المتمثل في المجرمين الذين يطوفون الشوارع وفي كل الاماكن و الهيئات .

خامسا : نتوجه الي الشباب المخلص القائم علي حماية تراب مصر ان يقوموا بمراقبه التجار و اصحاب الخدمات الاستهلاكية و ان يلتزموا بالاسعار والا يستغلو الظروف و الا سيكونوا اول من يحاسب من الشعب قبل حسابهم من الجيش او الشرطه .

سادسا : ان اتفاقية السلام تنص علي ان اي خلل داخلي في الجبهة الداخلية في مصر يسمح بتحرك جيش العدو الي داخل سيناء و فرض سيطرته عليها افيقوا افيقوا العدو تحرك بدباباته تجاه حدود مصر يوم الاحد الماضي .!!

ركزوا بئا في الحته دي !!

انها الدعوة مرة اخري الي كل من لديه ابن او ابنه او اخ او اخت او قريب او صديق ارجوكم عودوا الي منازلكم و مناطقكم لحمايتها و لحماية مصر افعلوا هذا لأجل تراب مصر

توقيع :

مواطن مصري بيحب مصر و ليس له اهداف سياسية ولا ينتمي الي اي حزب .

فكرة نبيل ابو سلامه

ملحوظه : نتكلم بإسم العقلاء و المخلصين لتراب مصر و لسنا مع احد ضد احد فنحن نتكلم بالعقل (احا) والله اكبر و العزة لمصر

ولسنا ممن يصارع علي السلطه .!!!!

************
الخري اللي فات دا اسمه منشور كان بيتوزع علي الناس اثناء الثورة المصرية (اللي لسه مخلصتش) ....!


الاثنين، 2 مايو 2011

اللجنة التأسيسية لدعم الأنتفاضة الفلسطينية 15/5/2011

نحن مجموعة من الشباب المستقلين والحركات السياسية نؤمن تماما بأن الطريق لتحرير
القدس يمر عبر القاهر، وأن تحرير القاهرة لن يتم دون تحرير القدس.
مبادئنا:


1. لا نعترف بالكيان الصهيوني ونعتبره كيانا مغتصبا غير شرعي. نؤمن بحق
العودة لكل فلسطيني أخرج من أرضه وبيته غصبا.


2. صراعنا ليس مع اليهود كأصحاب ديانة، وإنما مع الصهاينة؛ هؤلاء الذين
يؤمنون بحق "اليهود" في الاحتلال الصهيوني للأرض الواقعة بين نهري النيل
والفرات. فاليهود الذين هم ضد الصهيونية هم حلفاؤنا، بينما العرب أو
المسلمون أو المسيحيون الذين يوالون الصهاينة هم أعداؤنا.


3. فلسطين هي قضية مصرية أصيلة، وليست قضية "شعب شقيق" بقدر ما هي قضية
الشعب المصري. ذلك أن الكيان المعادي الرابض على حدود مصر لم ولن يكتفي
باحتلال فلسطين، بل امتد نفوذه غير المرئي لمصر والبلاد العربية الأخرى.
ولن يكتمل تحرير مصر قبل تحرير فلسطين.


* خططنا:


قبل 15 مايو


- حملات توعية في الشوارع والأحياء والجامعات المصرية.


يوم 14مايو:


التجمع الساعه 9 في ميدان التحرير والانطلاق الساعه 12


- مسيرة شعبية إلى فلسطين عن طريق معبر رفح والدخول لغزة والتوجة لمعبر
ايريز



- محاصرة سفارة الكيان الصهيوني في الجيزة، وبيت السفير الصهيوني في
المعادي (لمن لن يشارك في المسيرة).


* أهداف المسيرة:


1. التأكيد على حق العودة لجميع اللاجئين والمهجرين الفلسطينيين.


2. فتح معبر رفح بشكل دائم.


3. وقف تصدير الغاز المصري إلى الكيان الصهيوني، وإلغاء جميع الاتفاقات
المذلة، وقطع جميع العلاقات التجارية والسياسية معه.



4. الإفراج عن جميع المعتقلين الفلسطينيين في السجون المصرية.
وهذا في سياق النضال لتحقيق الهدف الرئيسي تحرير كامل الأرض المحتلة.


_____________________________


تابعونا علي صفحة تحرير القدس بدأبتحرير القاهرة


http://www.facebook.com/intfada15.5?sk=wall


الهاتف
0140615442 -01521978202

الخميس، 31 مارس 2011

رسالة الي كل القوي السياسية

رسالة الي كل القوي السياسية ..! فكوا نفسكم من الإختلافات الأيديولوجية دلوقتي ..! لأن احنا معندناش رفاهية الإختلاف في الوقت اللي احنا فيه ده !! ناس تقول لك ليبرالية ! و ناس تقول لك إشتراكية !! طب نخليها علمانيه !! طب نخليها مهلبية !! بس في ناس بتقول لك لأ بئا دي لازم تبقي شيوعية يا إما اسلاميه !!! احا بجد ..! احنا عاوزينها مصرية !! ميد ان ايجيبت يا اغبيا !!

عاوز بس اقول لكم حاجه .. المواطن المصري البسيط عمره ما حط في دماغه أي ايديولوجيات .. ومش معني كدا انه غبي او مش ف دماغه الدنيا !! لأ مش كدا خالص .. ابسلوتلي نوت ..! المواطن البسيط كل همه في الدنيا ( حياة كريمة .. وصول كامل للمرافق الأساسية .. تأمين صحي متكامل .. دخل مادي متوسط ) ..!! مش بئا تقوللي يسار اليمين و يمين اليسار و نص الشهر و اخر الشارع و جو رخيص فشخ !!

يا جدعان لو انتوا بجد جدعان .. احب اقول لكم لو مش واخدين بالكم .. ان مصر في خطر .!!

مصر في خطر .. و الثورة في خطر .. مستقبلنا في خطر .. الساعات االلي كنا بنفكر فيها عشان مستقبلنا و مستقبل ولادنا هتروح ع الفاضي .!
التعب اللي تعبناه و الجهد اللي اتعمل في الثورة و الشهداء اللي ماتوا علشان مصر ..كل ده هيروح ع الفاضي لو فضلنا نفكر بنفس الطريقة بتاعت قبل الثورة .. طريقة التخوين و الإقصاء الجماعي و التفتيش في الضمائر و كل الهبل ده لوحده ثورة مضاده احنا بنعملها .!!

إمضاء : مــواطــن مــصــري

الثلاثاء، 15 مارس 2011

لأ للتعديات الغير دستورية


يوم 9 مارس المفروض ان المصريين هيقولوا رأيهم في التعديلات الدستورية الاخيرة .. ب نعم او لأ .
و الحقيقة ان في ناس كتيييير اوي مش عارفين يعملوا ايه ؟؟ يقولوا نعم ولا لأ !! و بصراحه انا برضو ماكنتش عارف اقول اه ولا لأ ؟؟!!!!
بس خلاص انا قررت بعد دراسه كويسه اني اقول لأ و لأ بتاعتي دي علشان كذا حاجه منها :

1-ان كل مادة من المواد المقرر الاستفتاء عليها يتم قراءتها و فحصها بعناية و الاستفتاء عليها ,وكل مادة تكون لوحدها علشان مش هيصه هيا .!!

2- في رأيي الشخصي ان مفيش وقت عند المصريين علشان يفهموا كل ماده بتقول ايه ..الوقت قصير جدا ..

3- ان المواد المقرر الاستفتاء عليها مكانش بينها اي مادة من المواد المختصة بصلاحيات الرئيس و دي مبدئيا خيانه ف حق الثورة و الشهداء

ع العموم دي الاسباب اللي خلتني اقول لأ علي التعديات الغير دستورية المقرر الاستفتاء عليها


اما رأي صاحبي احمد شلبي فكان :-


مابين لأ أو أة كنت حيران ومبسوط جدا فى أول مراحل الحرية فى بلدى , وهاقول لأ للتعديلات الدستورية , ونفس الناس الى كانت بتقول أستقرار وسيبو الريس يعقد الست شهور الى فاضلين بتقول ( نعم ) ,,,, اما بقى القلة المندسة والبرادعى بلال فضل و
المستشار عادل قورة(رئيس محكمة النقض الأسبق، رئيس لجنة تقصى الحقائق حول أحداث ثورة 25 يناير)
وناس كتير أوى انا بثق فيهم وكمان مقتنع برائيهم بتقول لأ .
اة فى حاجة تانية عاوز أقولها : معنى نعم من وجهة نظرى يعنى نعم لدستور لم يحقق لمصر سوى فساد وانهيار اقتصادى و تعليمى و سلب للحريات و دكتاتور حكم مصر لثلاثون عام وكل الى هايقولى ميدان التحرير موجود أسف فى ناس كتير ماتت عاشن نوصل هناك ومفيش أى داعى ناس تانية تموت وأقتصاد البلد يوقف وسياحة تتنيل تقف.

عفوا هذا وقت التغير ..




السبت، 15 يناير 2011

2011 .. بداية النهاية

في هذة اللحظة التي أقوم فيها بكتابة هذة السطور , أعلنت حالة الطوارئ في تونس و قام الرئيس التونسي بإقالة الحكومة و حل البرلمان , ثم تواردت الأنباء عن هروب الرئيس زين العابدين بن علي .. امتثالا لمطالب الشعب التونسي الثائر عن حق .

و إذا نظرنا إلي الأوضاع في هذا البلد الشقيق و متابعة ما يجري فيه منذ ثلاثة أسابيع و حتي هذة اللحظة , فسنجد أن هذه الإجراءات الآخيرة ما جاءت إلا نتيجة للإحتجاجات والإضرابات العامة للشعب التونسي , و التي بدأت وأخذت مجراها الحالي تضامنا مع أحداث مدينة سيدي بوزيد, و التي بدأت بعد أن قام شاب تونسي بإحراق نفسه إحتجاجا علي البطالة .

و سرعان ما أنتشرت بكثافة موجة الإحتجاجات و التظاهرات العارمة في كافة المدن و المحافظات التونسية , و هو ما أدي الي أن يقوم الرئيس التونسي (الهارب) زين العابدين بن علي بإلقاء ثلاثة خطابات موجهة الي الشعب التونسي , كان الخطاب الأول و الثاني منهم عبارة عن لغة تهديد مباشرة من الرئيس الي الشعب , أما الخطاب الثالث و الآخير فكان يحمل لغة الإمتثال لمطالب الشعب التونسي , و ذلك بعد أن فازت لغة الغضب الشعبي علي لغة القمع و الإستبداد الحكومي .!

في هذا اليوم - الجمعة 14 يناير 2011 - تظاهر أكثر من عشرون ألف مواطن تونسي في العاصمة التونسية وحدها وذلك بخلاف الأعداد الغفيرة التي تظاهرت بالتزامن في هذا اليوم في باقي المدن التونسية , أي أنه يوجد إتجاه شعبي عام و موحد حول عدة مطالب يأتي علي رأسها : إسقاط الرئيس التونسي عن الرئاسة .
فإذا كنت من المتواجدين في تونس , أو تشاهد ما يحدث هناك عبر القنوات الفضائية , فلن تجد إلا المعارضين لحكم الرئيس التونسي ولن تجد مؤيد واحد له , أي أن الشعب و بدون اللجوء الي التنظيمات و الأحزاب السياسية المعارضة , قد حدد موقفه و أعلن معارضته التامة للنظام التونسي الحاكم و للرئيس التونسي القابع في سدة الحكم منذ ثلاثة وعشرون عام .

ثلاثة أسابيع من الإحتجاجات و الإعتصامات المتواصلة كانت نتيجتها هروب الرئيس المستبد - إقالة الحكومة الفاشلة -حل البرلمان .. ولا يزال الشعب متواجد بشوارع المدن التونسية , وذلك لأنهم قد أيقنوا أن أول المطالب الشعبية هي إسقاط الحاكم الظالم وليس إسقاط الحكومة أو حل البرلمان .
وقد أيقن الشعب التونسي بأن ما هي الإستفادة من إسقاط الحكومة و حل البرلمان إذا كان الرئيس لا يزال موجودا علي كرسي الرئاسة ؟!!
فكانت المطالبة الموحدة من الشعب التونسي هي إسقاط الرئيس و ليس إسقاط الحكومة .

هذا بالنسبة لتونس , أما بالنسبة للجزائر فكانت الإحتجاجات و الإضرابات المدنية قد انتشرت في الشارع الجزائري وهو ما أدي الي السيطرة علي هذة الإضرابات ولكن في خلال أربعة أيام من بدء هذة التظاهرات , أعلنت الحكومة تخفيض الأسعار وذلك في محاولة منها لتهدئة الغضب الشعبي .
و لكن رأت الحكومة الجزائرية وهو ما بات واضحا للجميع بأن موجة الغضب الشعبي في تونس قد امتدت و بشكل ملحوظ الي الشعب الجزائري , وهو ما أدي الي أن تتخذ الحكومة الجزائرية القرارات المناسبة للحد من توتر و غضب الشعب الجزائري .

و هذا ما يتعلق بالجزائر , أما في الأردن فكانت لهذة المملكة الهاشمية نصيب من المسيرات الشعبية الغاضبة أيضا , فقد نظمت العديد من الحركات و الأحزاب السياسية المعارضة في الأردن ما يسمي بيوم الغضب الأردني و كان ميعاد هذا اليوم هو يوم الجمعة 14 يناير 2011.
و جاءت هذة المظاهر الشعبية الغاضبة إحتجاجا علي إرتفاع الأسعار و عدم القدرة علي تحمل تكاليف الحاجات الأساسية .
فقد نظمت مسيرات شعبية في كافة محافظات الأردن بعد صلاة الجمعة و قد استمرت لعدة ساعات من مساء هذا اليوم العظيم , و انتهت بإعلان إعتصام مفتوح يبدأ من يوم الأحد المقبل و ينتهي بالإمتثال لمطالب الشعب الأردني .

و علي الرغم من أن الأنباء عن الوضع في الأردن قد أشارت الي أن مؤيدين للحكومة قد إشتبكوا مع المتظاهرين الغاضبين , فإن هذا لا يمنع بأن ثورة الغضب قد نجحت في إيجاد توافق عام علي مطالبها .
وفي رأيي الشخصي فإنني أري أن هذه الإحتجاجات الشعبية في معظم الدول العربية جاءت بالتزامن مع بعضها البعض , و جاءت أيضا لإحساس الشعوب العربية بأن حكوماتها تمارس ضدها كافة اشكال الإضطهاد و القمع و الإستبداد , ومع إقتناع تلك الشعوب بأنها المقرر الوحيد لما يحدث , و أن بإستطاعتها أن تحدث إنقلابا علي الواقع الموحش التي تعيشه منذ فترات متعاقبة .

**********
و أخيرا أحب أن أوجه تحية الي الشعب التونسي علي إنجاح مهمة الإنقلاب علي الوضع المؤسف و أتمني لهم دوام الكرامة و الحرية , أما الشعبين الجزائري و الأردني فأقول لهم : إستمروا في غضبكم .. تنالوا الحرية .
تحية الي الشعوب الثائرة عن حق .

و أوجة رسالتي الثانية الي الشعب المصري :
إنني كمواطن مصري أعلم تماما بأنه يوجد حالة من الغضب الشعبي المكتوم تجاه سياسات النظام الحاكم في مصر , و لكن علينا نحن الشعب المصري القوي أن نطلق العنان لهذا الغضب الكتوم , لينفجر في وجه نظام فاسد استولي علي الحكم منذ ثلاثين عاما ولا يجد ما يحمي شرعيته غير حالة الطوارئ .
هذا النظام الفاسد الذي إستخدم كل أساليب القمع و الوحشية ضدنا .. نحن أصحاب البلاد .!
إنني لا أدعوكم الي ضرورة الإنضمام الي الحركات و الأحزاب السياسية المعارضة , ولكن أدعوكم الي ضرورة النظر بدقة علي أوضاعنا منذ ثلاثين عاما و حتي الآن .
أدعوكم الي ضرورة الإحتجاج علي هذا النظام الفاسد .
أدعوكم الي النزول الي الشارع المصري , تعبيرا عن رفضكم لكل من التوريث و الطوارئ و حكم الرئيس محمد حسني مبارك .
أدعوكم الي عدم الرضوخ لمن يحكمنا منذ ثلاثين عاما , و الذي بدأ حكمه لنا بقوله : لن استمر في الحكم أكثر من مدتين رئاسيتين فقط .!
أدعوكم الي مواجهة النظام الفاسد , لأن ذلك سيعود علينا بالخير و الكرامة و الحرية , ليس لنا فقط بل و للأجيال القادمة أيضا .. أبنائي و أبنائكم .

إذا كنتم لا ترغبون في أن يكون مصير أولادكم و بناتكم نفس مصير هذا الشاب السكندري خالد سعيد , فدعونا نسقط هذا النظام الفاسد .
إذا كنتم لا ترغبون في تزوير و تزييف أصواتكم في الإنتخابات البرلمانية و الرئاسية , فدعونا نسقط هذا النظام الفاسد .
إذا كنتم لا ترغبون في توريث السلطة , فدعونا نسقط هذا النظام الفاسد .
إذا كنتم لا ترغبون في المزيد من سنوات الطوارئ , فدعونا نسقط هذا النظام الفاسد .
إذا كنتم لا ترغبون في التمديد للرئيس محمد حسني مبارك , فدعونا نسقط نظامه الفاسد .

مواجهة القمع و الإستبداد تأتي بالغضب الشعبي وليس بالتجاهل الشعبي .