الخميس، 21 أكتوبر 2010

سنه أولي سياسة


سا الخير عليكم يا جدعااان ..! اول حاجه التدوينه دي عباره عن تلخيص لأول سنه ليا في النشاط السياسي و بالأخص هي عن الدوافع اللي خلتني انضم لصفوف المعارضة المصرية , و يمكن التدوين و الكتابة في اليوم ده هو تعبير مني عن احتفالي بعيد ميلادي علي طريقتي الخاصة.
و هيا طريقة جديده و يمكن مختلفه بس ده علشان انا جربت كل الطرق التقليديه في الاحتفال بعيد ميلادي في السنين اللي فاتت - يعني مفيش فكرة خطرت علي بالي و معملتهاش .!! و آخرها التدوين و البحث في ذكريات سنه فاتت .

انهارده 23 - 10 - 2010 .. و دا معناه انه فاضل 5 ايام و اكمل ال23 سنه من عمري و معناه برضو اني هاكمل اول سنه ليا في الشارع الساسي المصري . صحيح انه يوم 28-10-2009 انا ماكنتش في مظاهرة ولا كنت اعرف معني المظاهرات ولا كان عندي نية اني انزل مظاهرة !!
بس دا اليوم اللي قريت فيه خبر الإعداد لمسيرة الحرية بإتجاه قطاع غزة , و انا بشوف الخبر لاقيت ان القافلة هاتدخل غزة عن طريق معبر رفح البري .
المهم دخلت عالفيس كالعادة و نشرت الخبر و اعدت أدور عن أي جروب للقافله و لاقيته في الاخر و طبعا وش عملت جوين !!
في الأول الحلم خدني و قولت لنفسي : يا سلام لو أروح مع القافلة دي فلسطين . و بس الحلم اتقفل علي كدا و كملت يومي عادي و مفتحتش الموضوع تاني الا بعد شهر تقريبا و بالظبط بعد أحداث ماتش مصر و الجزائر !! طبعا أي حد فيكم بيقرا الكلام دا هايقول ايه دخل ماتش مصر و الجزائر في غزة ؟؟
اقولكم اني بعد أحداث العنف اللي حصلت في الماتش دخلت علي اكبر جروب مصري يدين العنف الجزائري .. ومن كتر التفاعل بتاعي في الجروب بقيت أدمن فيه - بعديها بفترة اتفقت انا و باقي الأدمن علي ان أحداث الماتش خلصت و ان الموضوع هايقلب بفتنة بين الشعبين المصري و الجزائري , و اننا لازم نوجه اتجاه الجروب من انه يدين الجزائر بأكبر قدر ممكن لأنه يحاول مصالحه الشعبين علي بعض و ان كان علي الأقل مصالحه الشباب المصري و الجزائري الموجود في الجروب .... ومن هنا ابتدت الحكاية .!!

لاقينا انه كل ما نحط استاتوس او فيديو علي الجروب يدعو للمصالحة , يظهر ناس أساميهم مصرية بس بيشتموا في مصر .!! و ناس أساميهم جزائرية بس بيشتموا في الجزائر .!!!! و أعدنا 3 ايام مش فاهمين في ايه لحد ما وصلت لنا رسايل من اعضاء في الجروب بيقولوا ان في ناس بتعمل هاك عليهم و بيشتموهم وفي سفاله جامده جدا بتحصل في الجروب .!!
بعد البحث الممل في الموضوع اتضح ان في مجموعه هاكرز اسرائيليين مستعربين دخلوا الجروب و هما اللي بيعملوا هاك علي الناس و بيبعتوا رسايل سافله للأعضاء .! فبدأنا نمسح الأكونتات بتاعتهم من الجروب بس كان طول المدة اللي اتفقنا عليها اننا نصالح الناس علي بعضها و الأدمن الكريتور مش بيشتغل معانا و مش بيتفاعل في اي قصه .

المهم عرفت أوصل لبروفايلات الهاكرز دول و عملت نوت بأساميهم و لينكات بروفيلاتهم و نشرتها علي الجروب .... مفيش خمس دقايق عدت علي نشر النوت دي و لاقيت اني اتشالت من الادمن و النوت اتمسحت و الادمن التانيين اتمسحوا برضو .!!شويه و قمت عامل لوج اوت و دخلت تاني لاقيت ان الاكونت بتاعي مش بيفتح و في شغل استهبال بيحصل .. استغربت جدا و أعدت احاول كذا مرة مفيش , بعت رسايل علي ايميل شكاوي التليفونات قصدي الفيس و برضو مفيش فايده .. اتقفل يعني اتقفل !!

عملت اكونت تاني و عرفت بعديها من باقي الادمن اللي كانوا معايا ان النوت اللي انا نشرتها (بتاعت الهاكرز.. و لسه محتفظ بالنوت دي لحد دلوقتي) كان فيها اكونت واحد بس عنده صديق مشترك عند كل واحد فينا , و طلع ان الصديق المشترك او العدو المشترك زي ما انا مسميه هو الادمن الكريتور بتاع الجروب . !!!
يعني م الآخر طلع عيل ابن ستين جزمة اسرائيلي مستعرب و عامل جروب هدفه التخريب و نشر الفتنه بين شباب مصر و الجزائر ولو حتي ع الفيس , و اللي ساعده علي كده ان عدد اعضاء الجروب وصل ل 90 الف عضو .. يعني يوم ما تقول يابن كذا هتلاقي في الف واحد ردوا عليك و قالولك يابن ستين كذا .!!

فهمت بعديها ان الاسرائيليين دول ورانا ورانا .. بيستفادوا من كل ضرر يحصل لأي بلد عربي حتي لو ضرر هايف .. المهم رجع في دماغي تاني موضوع قافلة الحريه و دخلت علي جروب القافله و راسلت الادمنز اللي فيها و عرفت منهم ان معاد وصول القافله هوا يوم
25- 12- 2009 ...يعني بعد 3 اسابيع من موضوع الجروب .. و ساعتها بس قررت اني أشارك في القافلة دي لكسر الحصار عن غزة و دا كان رد مني علي اللي حصل في الجروب المشئوم ..
جه اليوم الموعود و نزلت عند نقابه المحامين و دخلت النقابه و بعدها الأمن قفل علينا بوابة النقابه لأنه كان في وقفة بالشموع لمرور سنه علي بداية مجزرة غزة ..شويه شويه عرفت ان الامن سحب الأتوبيسات المخصصة للقافله المصرية و أن المشاركين هايصعدوا الموقف لإعتصام , بعديها بيومين وصلت القافله الأجنيه و عددها 1500 ناشط من عدة دول عربية و أجنبيه......

و من اعتصام عند نقابه الصحفيين لمظاهرة عند ميدان التحرير لندوة مش عارف فين للمشاركة في اعتصام الفرنسيين عند سفارتهم و هكذا .... لحد ما وزارة الخارجيه اصدرت امر بأنها هاتسمح لعدد 100 ناشط من اصل 1500 انهم يروحوا غزة علي ان لا يكون بينهم جنسيات مصرية او فرنسيه .
المهم القافله او الميت ناشط دول راحوا غزة و رجعوا تاني مصر و سافروا علي بلادهم .. و انا اصلا كان في دماغي اني هروح مع القافله دي و بعدها عادي هروح علي بيتنا و شكرا علي كدا .. بس اللي حصل و اللي كان ربنا كاتبه ليا هوا اني اتعرف علي شباب المعارضه المصرية اللي كانوا متضامنين مع غزة و اللي كانوا عاوزين يشاركوا في القافله .
شباب من حزب العمل و حزب الجبهة و التجمع و الناصري و شباب 6 ابريل , المهم عملت صداقات مع كل الشباب دول علي اختلاف ايديولوجياتهم الفكرية , من هنا لهنا ابتديت انزل المظاهرات الإعتراضية علي الأحوال في مصر وفي اول نشاطي ده كنت هانضم لشباب 6 ابريل بس اتراجعت عن قراري بعد اما عرفت ان قضيتهم الأساسيه هي التغيير في مصر و انهم غير معنيين بالقضيه الفلسطينية - مع العلم بوجود شباب من داخل 6 ابريل مهتمين بقضية فلسطين .
بس برضو ده مخلانيش اقطع علاقتي بيهم , بالعكس عرفتهم كلهم و عرفت كوادر 6 ابريل الاساسيين و بقينا اصحاب زيهم زي باقي شباب المعارضة المصرية .

و في يوم من شهر مارس في اوله الواد مصطفي مجدي -اول شاب مصري اتعرف عليه اثناء وجود قافله الحريه في مصر- عرفني علي شاب فلسطيني مقيم في القاهرة اسمه محمود ابو شرخ .. و كترت مقابلتنا وكتر كلامنا مع بعض حول فلسطين و مشاعر كل واحد فينا ناحية فلسطين .و شويه و محمود عرفني علي شاب مصري تاني اسمه احمد هشام متضامن برضو مع فلسطين .. احنا الاربعه كنا بنتجمع كل يومين علي قهوة في وسط البلد مع شخصيه كدا اسمها سيد رجب بس كان اكبر مننا في السن و كان سيد ده مفهمنا انه ياما هنا و ياما هناك و ان المعارضه دي كذا و الحكايات و بتاع وبتاع و شاي بالنعناع .!!
و في يوم و احنا الاربعه قاعدين مع بعض محمود قال لنا انه في حاجه اسمها اسبوع الفصل العنصري و ان دي فاعليه هاتحصل في كذا بلد علي مدار اسبوع كامل للتضامن مع فلسطين , بس المشكلة ان مصر هيا البلد الوحيده اللي مفهاش فاعليه عن اسبوع اافصل العنصري ده.

و من هنا اقترحنا اننا نؤسس مجموعه هدفها العام هو التضامن مع فلسطين اما الهدف الحقيقي هو إقامة فاعليه بالتوازي مع فاعليات العالم عن اسبوع الفصل العنصري و اتفقنا علي اسم ( ناشطون لأجل فلسطين ) بس الوقت كان ديق اوي و مكانش في الإمكانيات اللي تخلينا نعمل فاعليات علي مدار اسبوع كامل و اقترحنا اننا نعمل يوم واحد يضم كذا حاجه , و اخترنا يوم 9-3-2010 و هو بجانب انه يوم في الاسبوع التاني من شهر مارس هو برضو يوم ذكري مرور 1000 يوم علي حصار غزة .
و بالفعل عملنا اليوم ده من وقفه صامته و معرض صور عن مجازر غزة و هتافات و كدا يعني .. و الناس ابتدت تعرف ان في مجموعه شباب مصري عامل مجموعه تضامنيه مع فلسطين اسمها .. ناشطون لأجل فلسطين .

و من سخرية القدر ان سيد رجب ده الجثه اللي كنا بنروح نقعد معاها طلع معروف من زمان انه شخص بيتعامل مع الامن و بيبلغهم بأخبارنا و مواعيد المظاهرات بتاعتنا و كان بينقل اخبار القافله المتجهة لغزة للامن بإعتباره كان مدسوس في وسط المشاركين , و قابلنا سيد رجب في يوم احنا الاربعه : مصطفي - محمود - احمد و العبدلله .

و قولتله في وسط الشارع : انتا شخصيه وسخه بتتعامل مع الامن علي حسابنا و احنا مش عايزينك معانا في المجموعه . و بالفعل طردناه من المجموعه و حذرناه انه لو عمل اي نشاط بإسم مجموعتنا هانفضحه اكتر ماهو مفضوح .
و بصراحه يوميها كان نفسي اضربه و اكله علقة موت مش علشان هوا طلع عميل للامن لكن علشان هوا استغل اننا لسه جداد في العمل السياسي و علشان برضو انه كان مبين لنا انه متضامن مع فلسطين وهوا في الاصل غير مهتم ولا بفلسطين ولا حتي بمدينة نصر .!!

بعديها بفتره دخل شهر ابريل و شاركت انا و مصطفي مجدي في اول مظاهرة كبيره و هيا إضراب سته ابريل , و شوفت التعامل الامني الحقيقي مع المظاهرات دي بيبقي عامل إزاي .. سواء من ضرب المتظاهرين و خطفهم من داخل صفوف المظاهرة و سحل الشباب بنات و ولاد في الشوارع و التعدي السافل علي كبار السن المشاركين في المظاهرة .. يعني م الآخر مكانش في فرق .. كله بيتضرب .
يوميها اتخطف من جمبي كل الشباب اللي اعرفهم و اللي معرفهمش .. محمد سوكا و عبدالرحمن فارس و جو عادل و محمد عواد و محمود سامي و شخصيات شبابيه كتير و انا كان هايتقبض عليا بس محصلش ولا انا ولا الواد مصطفي .!!
و توالت المظاهرات سواء الكبيرة او الصغيرة .. كنت بشارك فيها بإيمان سواء كانت عن مصر او فلسطين .

بعديها اتعرفنا علي بنت اسمها فاطمه السيد من حزب التجمع و كان التعارف من خلال اجتماع لمجموعتنا لمناقشه تطورات القضيه الفلسطينيه و ايه اللي ممكن نعمله و اقترحنا مع بعض موضوع المقاطعه , و اختارنا اكتر مكان معروف انه صهيوني و هو كافيه ستاربكس.
نظمنا اول مظاهرة مفاجئة عند ستاربكس فرع المهندسين و علشان هيا كانت مفاجئة مكانش فيه امن ولا الكردون الامني الشهير و نجح اليوم بتاعنا , و اتكررت المظاهرات المفاجئة عند ستاربكس لحد ماوصل عدد المظاهرات ل 3 و معلش انا عارف انه عدد صغير جدا بس هوا صغير علشان انشغال بعضنا بأمور الحياة اليومية البعيدة عن السياسه .
و كانت اخر مظاهرة عملناها عند ستاربكس اتقبض علينا فيها و كان عدد المتظاهرين المقبوض عليهم 11 واحد ولاد و بنات و تمت محاصرتنا في اول الحكايه ورا فرع ستاربكس بشارعين و فضلنا واقفين في الشارع مع تحفظ الامن علينا لمدة ساعتين و نص و حققوا معانا في الشارع و جات الاوامر للامن انه يرحلنا علي قسم الدقي و هناك تم التحقيق معانا مرة تانيه بس بشكل فردي .

و كان السبب اللي خلانا يتقبض علينا هوا سبب واحد و هو ان في المهندسين في فرعين لستاربكس و احنا محددين من الاول تنظيم مظاهرتين واحده عند كل فرع , عملنا اول واحده و خلصناها و رايحين علي الفرع التاني .. بس كنا ماشيين مع بعض كلنا 11 واحد اللي ماسك علم و اللي ف ايده بانر و انا كنت ماسك الافرول و ماشيين ببطء شديد جدا لدرجه الملل و غير دا كله وقفنا نستني واحده كانت معانا راحت تجيب العربيه بتاعتها و مفيش خمس دقايق و الامن وصل عند ستاربكس و عرف اننا مشينا من الشوارع اللي ورا الفرع و اتقبض علينا ساعتها ..!

روحنا القسم و خلص التحقيق معانا و كانت الساعه 12 بليل اول ماخرجنا و لاقينا بره القسم اكتر من 30 ناشط مصري متضامن معانا و كانوا علي استعداد التصعيد لو احنا مخرجناش و فعلا احلي حاجه في شباب المعارضه المصريه انه في المواقف دي بيقفوا وقفه راجل واحد
من اجل هدف واحد وهو ان الناس اللي محبوسه في ناس برا واقفه مستنياها و مستعده لاي شيء وطبعا كل الشكر للناس اللي اتضامنت معانا سواء اللي اعرفهم او اللي معرفهمش .. شكرا السنين يا احلي شباب معارضه شفتهم في حياتي .
المهم و احنا خارجين كان في مننا اللي معنوياته في الارض و البنات كانت اعصابها متدمرة علي الاخر علشان هما اول مرة يدخلوا قسم شرطه , بس الحمدلله ماكنتش متوتر ولا اعصابي بايظه ودا مش علشان انا واد فتك و مفتح و الجو الديق ده لكن علشان انا بطبعي رخم و بارد مع اي موقف غريب و خصوصا لما يبقي الموقف ده جوا اسم شرطه و دا اللي خلاني اول ما روحت ادخل علي الفيس و ابعت رسايل لمحمود و مصطفي و احمد و اقول لهم : اوعي حد فينا يخلي الموضوع ده يأثر عليه و يحبطه و يقلل من معنوياتنا و ان احنا مؤمنين بالقضيه و عمر مافي حاجه هاتقلل من ايماننا بيها . و كان الرد منهم هوا نفس ردي و انهم مش زعلانين من اللي حصل و دا شيء وارد و الحمدلله كلامهم ليا رفع من معنوياتي اكتر .

و كتبت يوميها ع الفيس : لقد تم القبض علينا و لكنهم لم يقبضوا علي ايماننا بفلسطين .

عموما انا عارف انها قصه عاديه جدا بس هوا ده اللي حصل معايا في السنه دي و كل اما افكر انه ماتش مصر و الجزائر لو مكانش اتلعب و حصل اللي حصل من احداث عنف , انا ماكنتش دخلت علي الجروب المزيف ولا كنت اتحمست للنزول و المشاركه في القافله ولا كنت اتعرفت علي احلي شباب معارضه

************

بكدا اكون خلصت الجزء الاول من التدوينه اللي عارف انها طولت اوي بس معلش يا جماعه انهارده عيد ميلادي و استحملوني بقي !!
يمكن انا ماكتبتش عن مظاهرات كتير شاركت فيها و دا مش لقلة اهميتها لكن علشان التدوينه دي هيا طريقتي الخاصه في الاحتفال بعيد ميلادي .
ندخل بقي علي ذكر احلي و احسن و اجمد و احمد و اشرف و علي و مرسي ...... نياهااهاا
هاتكلم دلوقتي علي احلي شباب معارضه شفتهم و قابلتهم في حياتي و هاذكر كل واحد فيهم لانهم بالنسبه ليا اصحاب و اصدقاء و اخوات اعتز بمعرفتهم :-

مجموعه ناشطون لأجل فلسطين :-

* مصطفي مجدي : أول واحد اتعرف عليه في الشارع السياسي المصري و هو اكتر من اخويا و محبش انزل مظاهرة ولا اشارك في أي حاجه الا اما نكون مع بعض .. اكتر حاجه حلوة فيه ساعة لما بيضحك و انا بقول له : ايه يا سرس او ايه يا لوزا ... و هوا يقوللي : ايه يا قطه ..... حقيقي مصطفي مجدي من اكتر الناس اللي قريبه مني .

* محمود ابو شرخ : شاب فلسطيني بروح مصريه - اهلاوي متعصب - واد فريخه يعني و كلمة فريخه دي انا و هوا بس اللي عارفين معناها نيااهاا بس بجد واد طيب اتوي و انا بموت فيه و بكره مواعيده لول - احلي حاجه فيه لما بيقعد يشتمني بالعبري و انا أرد علي بالمصري و ساعات بالعبري .

* احمد هشام عجور : شاب دماغ مع نفسه بس واد زي العسل - دايما مشغول و مش فاضي - بس بعذره علشان هوا بومبو و شقيق كمان
احلي حاجه فيه لما بشوفه وهوا بيسمع ميتال و ياعه لما بيتكلم انجليزي .. مش بفهم منه اي حاجه .. ايه تو زد يعني نيااهاا .

*فاطمه السيد : بنت زي السكر - و بميت راجل رغم حلاوتها - طيبه جدا - بحب اوي اضحك معاها و نقعد نئـلش علي بعض .. اجمد حاجه فيها انها عقل مدبر في الحركه نياهاا .. هيا و مصطفي مجدي اكتر اتنين ملتزمين بمواعيد الاجتماعات و ياريت ياعم ابو شرخ انتا و عجور تحسوا بقي .

حركة شباب 6 ابريل :-

* محمد سوكا : واد ابن لزينه .. مفتح كدا و يسد معاك في اي قصه .. صاحب صاحبه م الآخر .. و جنن اهلي يوم لما كنا بنفطر مع بعض في رمضان .. بومبو و حبيبي و عمره مايديك ضهره لو واقع في مشكله .. احلي حاجه فيه هيا حماسه لحركة سته ابريل .

* محمد عادل ( العميد ميت ) :- عبارة عن عقل إلكتروني متحرك .. انا مسميه بيل جيتس سته ابريل و هوا فعلا يستحق .. بيهرج معاج معاك جامد و تموت م الضحك معاه بس ايده طويله في التهريج .. بس برضو بومبو

* ميكي ابن مصر : هوا ده لقبه ع الفيس .. عيل شنيع و يخربيت دماغه بجد .. احلي حاجه فيه لما بيقعد يكلمني عن كليب ساندي - ام رجلين حلوه زي ماهو مسميها .. و هيا فعلا رجليها حلوه يا ميكي .. واحشني يا بونط البونط .

* محمد محمود و ندي طعيمه : اول عروسين من شباب 6 ابريل .. و علي فكرة ندي اصلا كانت جارتي ايام لما كنت ساكن في شبرا و قابلتها يوم 6 ابريل و عرفتني علي خطيبها محمد محمود و طلع ان انا عارفه من الاول ... بس والله كان نفسي احضر الفرح بتاعهم و عدم حضوري هوا اني افتكرت ان الحنه يوم 2-10 اللي فات و طلع انه ده يوم الفرح مش الحنه .. والله بجد انا اسف يا محمد .. اسف يا ندي

* هدير محمد : دماغها في العلالي ع الآخر و التهريج معاها ملوش حدود بس استلم احلي تعليقات لما تتناقش معاها في قضيه معينه .. اول لما اتعرفت عليها كانت بتاكل كشري و مصطفي مجدي بصلها في العلبه قامت الشطه وقعت كلها ع الكشري نيااهاا بس والله زي العسل هدير.

* عمرو اسامه : الليبرالي الحاد .. زي ما انا مسميه .. ولو اني مش بحب الليبراليه بس بحب الواد ده اوي و كلمه السر اللي بيننا .. رئيس جمهورية الحديده امو سن ... فاهمني طبعا يا عمرو .

* موتا باه : الشيوعي ابن الايه ..دا لقبه عندي .. ولو اني برضو مش بحب الشيوعيه بس بحبه اكتر علشان هوا منايري زيي تمام و معايا ع الخط ساعه لما تقول محمد منير .... ويــري يا موتا .

حركة شباب من أجل العدالة و الحرية :-

* يوسف عادل : أو جو عادل .. اكتر واحد اختلفت معاه في الايديولوجيات و التفكير بس اكتر واحد احب اسمعه و هوا بيتكلم عن الاوضاع السياسية ... مؤسس حركة شباب مش فاهمين هه ودي صفحه سياسيه ساخرة ع الفيس .. اول ما عرفته كنت بتكلم عن العلمانيه و بنتقدها و هوا دخل ع الخط هوا و هدير في صف العلمانيه .... بس احلي حاجه متفقين عليها هيا ان الصحوبيه اللي بيننا فوق اي ايديولوجيا.. اكتر حاجه عملها قدامي و ضحكت عليها يوم لما كنا بنفطر مع بعض في رمضان و نزلنا نركب المترو علشان نروح مؤتمر البرادعي ..و احنا في المترو اشتغل امين شرطه و قال له : انتا مش عارف انا مين ؟؟ الامين قال له مين ؟؟ جو بص له من فوق لتحت و قال له : انا تبع احمد بيه الوسخ .!! مواهااهاا ..... م الآخر جو يعتبر النسخه الشبابية من الساخر المصري و عمنا كلنا الاستاذ جلال عامر .. و بالمناسبه هوا عيد ميلاده يوم 28 - 10 برضو .... حبيبي يا جو .

*هيثم صلاح : واد ألاش اخر سبع تمن حاجات .. لما تهرج معاه ماتزهئش خالص .. هراني ألـش و ألـشت عليه لما كنا رايحين غزة و قعدنا عند معبر رفح .. و استخبينا مع بعض يوم مسيرة شبرا لما الأمن طلع يجري ورانا في رمسيس واد بومبو و عيل اصلي .

* حسام الصياد : واد شقي ابن جنيه .. تشوف كلامه ع الفيس تحس ان صلاح جاهين عندك في الفريندز .. من الشباب الجدعه اللي عمره مايديك ضهره في اي مشكله .. و كان برضو من ضمن الناس اللي جريت معانا يوم مسيرة شبرا .. بس واد ألـيش اخر حاجه .

* خالد السيد : في مقام اخويا الكبير .. شخصيه كارزمية .. و اجدع واحد يؤلف هتافات لدرجه اني بضحك السنين و انا بقول اي هتاف وراه .. و كان اول واحد اشوفه يوم لما اتقبض علينا عند ستاربكس .. و بصراحه الشغل اللي بيعمله في حركه شباب من اجل العداله و الحريه يستحق عليه التقدير .

* محمد عواد : اكتر واحد حافظ هتافات فلسطينيه و مصريه .. هوا و خالد السيد احسن دويتو سياسي .. و اكتر المظاهرات اللي شاركت فيها كانت بقيادته هو و خالد .

* احمد دومه : المتحدث الإعلامي لحركة ناشطون لأجل فلسطين .. عرفته يوم مظاهره 9 مارس و من كتر الحماس اللي كان فيه اليوم ده حسيت انه هوا مؤسس المجموعه .. بس هوا بصراحه يستحق .. اتعمل له قواضي كتير ظلم و اهمها لما دخل قطاع غزة ساعه المجزره و ساعه مظاهرة 3 مايو .. لقبه عندي هوا طير الحق لانه فعلا طير الحق .. انسان بجد و بطل في نظري .. مش انا بس اللي بحبه لأ دي كل صفوفالمعارضه عارفاه و بتحبهو يعتبر اخونا الكبير .

شباب حزب العمل الاسلامي :-

* دعاء جمال الدين : بنت مصريه ميه في الميه و روحها فلسطينيه .. شجاعه ومش بتخاف من اي حد .. الحق عندها فوق اي شيء..عامله زيي بالظبط مؤمنه بقضيه مصر و فلسطين .. كتابتها هي اللي عرفتني بالمجاهد مجدي حسين ولو اني معرفوش شخصيا بس كلامها عنه خلاني احس انه موجود معانا ..

* مديحه قرقر : بالظبط زي دعاء مصريه ميه في الميه بروح فلسطينيه .. هيا اول من اطلقت عليا لقب صديقي الألاش او الألاش السياسي .. ضحكتها حلوه .. احتجاجها مصري .. و ثورتها فلسطينيه .

* ضياء الصاوي : ممكن نكون مختلفين في بعض القضايا بس دا مايمنعش من انه واد جدع و ماشوفتش منه حاجه وحشه .

* حسن البنا : او ابن البنا زي ما بحب اقول له .. كل اما يشوفني يقولي مرة واحد صعيدي مراته اغم عليها شممها رجله .. نكته كنت قولتهاله قبل كدا و هوا استمها مني و خنقني منها .. بس واد ابن لزينه .. يوم 6 ابريل كان مقبوض علي اخواته الاتنين و كان قاعد معانا عادي و عمال بيضحك و لما سألناه قال لنا عادي يا جماعه كدا كدا هايخرجوا .. بس واد حديد بسن .


الشباب المستقل .. او اللي معرفش هما تبع ايه !! :-

* عبدالرحمن فارس : اخو حسن البنا و عاشق شيكولاته كادبوري الاول .. طريقه تعبيره عن الاوضاع في مصر هيا اللي خلتني اعمل مدونه زي ماهو عامل .. شخصيه معبره جدا .. متضامن مع الحق .. متضامن مع الحريه .. و اكتر حاجه بحبها فيه لما بيكتب شعر في شيكولاته كادبوري .

* نيللي عبد العزيز : او نيللي مصر مش عزبه ابوك و دا الاسم اللي كانت عامله بيه بروفيل ع الفيس .. بنت مصريه جدعه و بسيطه .. بحب اتكلم معاها .. قضيه التغيير عندها اهم شيء .. عدائها لعم حزومبل اللي مودي مصر في داهيه اكبر من عداء توم لجيري .. جديده في النشاط السياسي زيي بالظبط ودا اللي مخليني متفق معاها في ان الاختلافات الفكريه لشباب المعارضه ملهاش اي تلاتين لازمه لما تكون قضيتنا واحده.

* ماهينور المصري : بنت اسكندرانيه بروح قاهريه ..اتعرفت عليها اثناء اعتصام اهالي طوسون عند وزاره الزراعه و الل خلاني اتكلم معاها هي الكوفيه الفلسطينيه بتاعتها .. بنت جدعه بميت راجل قضيتها زيي برضو قضيه مصر و فلسطين .. ماتكلمتش معاها كتير بس متأكد من وطنيتها و حماسها .

* رقية طبيله : بنت فلسطينيه مقيمه في القاهرة ..ماتكلمتش معاها كتير .. بس لما بشوفها بالكوفية الفلسطينيه بحس اني شايف فلسطين قدامي ... و مفيش احلي من كتابتها عن فلسطين .

* محمد شلبي : في نظري هو الابن الروحي للبرادعي .. متحمس له جدا و دا شيء كويس جدا .. اتعرفت عليه يوم مظاهرة 3 مايو و كان متضايق جدا و غضبان من عدم اكمال المسيره و انحصارها في مظاهرة ..جدع جدا و بحس اني عارفه من زمان و ان جبت سيره مصر هتلاقيها محفورة جواه .

*عمرو عز : محامي الشباب المعارض .. مؤيد لايمن نور و شاب غداوي صميم .. اه انا مش بحب الليبراليه بس بحب عمرو و احلي حاجه بضحك عليها معاه لما يتكلم في موضوع جد و انا ادخل ائـلش عليه بحس انه عاوز يولع فيا بس هوا عارف اني بهرج معاه و بحب فيه ضحكته البسيطه .

شباب من خارج مصر :- و هما مجموعه شباب من بلاد عربيه اتعرفت عليهم السنه دي سواء في قافله الحريه او من علي الفيس .

* فرح روايسطي : بنت لبنانيه عضو في حركة شباب ضد التطبيع .. الحريات في لبنان و اوضاع فلسطين قضيتها .. لما بتكشر بتبقي جد اوي بس ضحكتها حلوه اوي .. علي الرغم من اني عارفها من مده بسيطه بس بحس انها اختي ومش هاقول الكبيره ولا الصغيره .. اختي و خلاص .. يوم لما اتقبض علينا عند ستاربكس نشرت الخبر عندها و علي الصفح المصريه و بجد شكرا السنين لوقوفها معانا .. و علي فكرة يا فرح انا مش عارف ليه لما قولت لأمي هاتي 4000 جنيه علشان أروح لبنان و احضر حفله فيروز مسكت الكرسي و كانت هاتحدفني بيه.. عموما تحيه خاصه لكل من فرح و لبنان و فيروز .

* باسل : شاب سوري اتعرفت عليه اثناء وجود قافله الحرية في مصر .. بحس انه معتز بتاع باب الحارة .. و بحب اقول له : مـيـــــــعتـز!! و هو يقول لي : علي راسي عـجـــيد .. واحشني بجد يا باسل .

* رقيه شمس الدين : بنت لبنانيه ممقيمه في امريكا .. اتعرفت عليها اثناء قافله الحريه في مصر .. هيا وعدتني انها تنزل مصر قريب و مش هاقول غير اني نفسي اشوفها تاني .

**********************

يارب اكون كتبت كل الناس و ما نسيتش حد .. وعموما يا جماعه انا بجد فخور جدا اني اعرفكم و مقتنع تماما بإن من غيركم ماكنتش هاعرف حاجات كتير .
كل سنه و انتم طيبين و سلام بقي !! عاوز اروح اكل الجاتون اللي امي جايباه

الأحد، 17 أكتوبر 2010

الشرق الاوسط .. و الصراع الحقيقي


تعد منطقة الشرق الأوسط من اكثر مناطق العالم اضطرابا , فهي المنطقة الوحيده في العالم التي يشكل الصراع فيها موازين القوي الأقليمية و العالمية , حيث ان الصراع في هذه المنطقة هو صراع وجودي قائم علي تناحر الايديولوجيات الفكريه و الدينية .
و لقد اتجهت انظار العالم بشكل عام الي الشرق الأوسط بعد اعلان قيام دوله ( الكيان الصهيوني ) علي أرض فلسطين لتكون وطنا قوميا لليهود .
ويأتي تحالف القوي الإستعمارية الكبري سواء الإتحاد السوفيتي سابقا او الولايات المتحدة الامريكية و حلفاؤها الغربيين و في مقدمتهم فرنسا و بريطانيا, مع اسرائيل ضد العرب عموما , من خلال عدة اهداف رئيسية تم الاتفاق عليها و هي :-

1- زرع دولة معادية تماما للعرب بداخل أراضيهم , تحميها الشرعية الدوليه من خلال الإعتراف بها كدوله ذات سيادة .
2-رغبة اوروبا الشرقية و الغربية في التخلص من اليهود عموما بإعتبارهم اكثر الطوائف إثارة للفتن و المشاكل .! و لدينا بالتاريخ
ما يثبت المجازر التي تمت بحق اليهود داخل البلاد الأوروبية التي دعمت حق اليهود في إقامة وطن لهم علي أرض فلسطين العربيه .

وفي هذه التدوينه لن اتحدث عن ما نعرفه جميعا فيما يتعلق بنكبة فلسطين و حرب الستة ايام وصولا الي حرب 73 , ثم فك الارتباط و من بعدها الاتفاقيات الكاذبه و في مقدمتهم اتفاقية اوسلو .!!
بل انني سوف اضع ما يدور بعقلي امامكم , وهو الحرب القادمة داخل الشرق الشرق الأوسط .

جميعنا يعلم انه لا سلام مع من خانوا أمانه الانبياء .!!
و نعلم أيضا ان إقامة دولة فلسطينية في ظل هذا الوضع الراهن , امر بعيد عن التحقيق الفعلي .
اما اذا تمت بالفعل إقامة دوله فلسطينية , فإن سيادة هذه الدولة علي الأرض ستكون علي امتداد شارع رئيسي او اكثر بقليل و ذلك نظرا لقضايا داخلية تتأرجح مابين الاستيطان الجارف و الاحتلال و سلطة الوضع القائم , التي تصب في مصلحة الكيان الصهيوني بشكل عام .

لذا فعلينا الاقرار بأن عودة فلسطين كاملة لاصحابها امر لن يحدث الا عن طريق واحد وهو .. التحرير - الحرب المقدسة. ( اطلقوا عليها افضل ما عندكم) ..!

و بالنظر الي الأوضاع الحالية داخل بلدان الشرق الأوسط فلا نري غير الغموض التام !! و تنهمك عقولنا في الإجابة عن أسئلة حول نهاية تلك الأوضاع الراهنة, ومنها :
1-هل هناك حرب قادمة تنتظر من يناديها ؟؟!
2-وهل هذه الأوضاع الحرجة تعتبر بداية لتلك الحرب , ام انها مجرد الحرب النفسية بين الاعداء و بعضهم ؟!!

حقيقة الامر .. لا اعلم!! وذلك لكثرة التقارير المعلوماتية بداخل اجهزة المخابرات حول موازين القوي الأقليمية داخل الشرق الأوسط , و حول إمكانية حدوث حرب بين اسرائيل طرف النزاع و حليفتها امريكا من جانب و بين كا من ( سوريا - ايران - حزب الله - حركة حماس ) من جانب اخر .
وإذا كانت هذه الحرب القادمة سيكون اطرافها القوي السابق ذكرها , ام أن هناك اطرافا اقليميه اخري سوف تدخل او تجر الي هذه الحرب
و إذا كانت هذه القوي ستدخل الحرب بإعتبارها تابعة للحديقة الصهيو امريكية , ام للدفاع عن الكرامة العربيه المسلوبه .. فإعتقادي هو ان الحرب قادمه لا محال .!!
ولكنني أري ان الأنظمة العربيه - من المحيط الي الخليج - هي أنظمة حكم فاسدة , استمدت شرعيتها الكاذبة من الوجود علي رأس السلطة اكبر الفترات الممكنة , ومن قمع الحريات و بالتحديد حريات الرأي المعارضه لها , بالأضافة الي إعلاء شأن المصالح الإقتصادية و التحالفات السياسية مع القوي الخارجيه علي المصالح الوطنية بشكل عام , وذلك اعتقادا من هذه الأنظمة بأن الرضوخ للقوي الإستعمارية الكبري يضمن لها البقاء في السلطة مدي الحياه , وصولا الي تناسي قضية فلسطين - قضية العرب الأولي و الأخيرة - مما أدي الي انتشار حالات اليأس داخل البلاد العربية بأنه لا قيمة للعرب في ظل رضوخ الأنظمة العربية الفاسدة لأمريكا و حلفاؤها الغربيين .

فإذا كنا فعلا نريد خوض معركة التحرير المقدسة بشرف و كرامة , وإذا أرادنا ان تكون نتائج هذه الحرب في صالحنا , و تكون نواة لإعادة الكرامة المسلوبة ... فعلينا اولا ان نخوض الحروب الاساسية بداخل بلادنا العربية ضد انظمة الحكم الفاسدة .
و إذا كنا ننادي بدعم المقاومة الفلسطينية عن طريق تأييد النظم العربية الحالية لها , فعلينا اولا ان ندعم المقاومة الوطنية الداخلية و مسانداتها
في الحرب علي فساد الأنظمة العربية الحاكمة , و العمل علي وصول سلطة الشعب الحقيقية الي الحكم .

و لذلك فعلي الشعوب العربية التي مازالت تبحث عن الكرامة الضائعة ان تنتفض من خلال ثورتها ضد الظلم الداخلي اولا و العمل علي إحلال الديموقراطية الحقيقية .

و إيمانا مني بذلك فأنني أري انه من الغباء السياسي أن يتواجد بيننا من يؤمن بوجود قوي عربية قادرة علي خوض حرب ضد الكيان الصهيوني بدون ان تكون هذه القوي العربيه متسمة بالديموقراطية التي نحلم بها .
و ذلك مايجعلني اتعجب كثيرا من الأصوات التي تهلل لكل من ( سوريا - ايران - حركة حماس - حزب الله ) و تقول بأن الخلاص من الكيان الصهيوني قادم علي أيدي هذا الحلف .!!
فكيف لنظام فاسد ان يكون قادرا علي خوض معركة نزيهة ؟!!و أن تكون هذه الحرب ليس لزيادة رقعه السيادة علي الأرض بل لاسترداد الكرامه ..!
كيف علي نظام فاسد يعتقل معارضيه و يسكت من ينادي بالحرية و يعذب من يقول بصراحة لا للفساد , ان يكون مدافعا عن الكرامه و يكون
رمزا للشرف و العدالة ؟!!
كيف علي الأنظمة التي تزور الانتخابات و تقيد الحريات , ان تكون رمزا للعدل و الحق , بل و تحمل راية التحرير ؟!!

فبالنظر الي الدول العربيه المعتدلة او دول محور الممانعة المذكور سابقا و كيفية إدارة شئون بلادهم , فهل نري الحريات ؟؟ هل توجد الشفافية المطلوبة في الحكم ؟؟ هل هناك ديموقراطية حقيقة ؟؟ هل توجد معارضة حقيقية خارج المعتقلات ؟؟!
هذا فيما يخص ايران - بإعتبارها قوي اقليمية ممانعه - و سوريا و مصر و السعودية و الأردن و الكويت
و الجزائر و المغرب و تونس و ليبيا و باقي الدول العربية الأخري .

اما فيما يخص حزب الله و حركة حماس , فقد اتسمت تلك الحركات بالتمسك بسلاح المقاومة ضد الاحتلال الصهيوني .. و الكل يعلم موقفي الثابت من المقاومة عموما و اهميتها في الصراع العربي الصهيوني .. و لكن .!!
نعلم جميعا ان سوريا و إيران تدعمان حزب الله و حركة حماس , ولكن ألهذا السبب تفضل كل منهما , سوريا و إيران علي بلدانهم الأصلية ؟
هل هذا الدعم يسمح لحزب الله و حركة حماس بإثارة الفتن داخل بلادهم و أن يقيدوا حرية من يعارضهم ؟
هل هذا الدعم يسمح لحزب الله و حركة حماس بأن يستخدموا سلاح المقاومة لإراقة دماء اخوانهم من الفلسطينيين و اللبنانيين ؟!!

إن الصراع الحقيقي داخل الشرق الأوسط يكمن أولا في الثورة علي انظمه الحكم العربية الفاسده و من ثم تأتي حرب التحرير المقدسه .
و لذلك اكرر قولي بأنه علي الشعوب العربية الانتفاضة و الثورة ضد انظمة الحكم الفاسدة و العميلة , و العمل علي وصول سلطة الشعب الي الحكم و إقرار الديموقراطية السليمة و العادلة .

و في النهاية احب ان أوجه رسالة الي اخواني و اخواتي من الشباب العربي :

* إذا كنا مختلفين ايديولوجيا و فكريا , فإن غياب الديموقراطية و ضياع كرامتنا كعرب , هي قضايا مشتركة بيننا .
* علينا أن نعلم بأن الثورة علي انظمة الحكم الفاسدة هي أول و أهم معركة في حرب التحرير المقدسة .
* علينا نحن الشباب العربي بعدم ترك أوطاننا و البحث عن أوطان بديلة .
* إننا كشباب مثقف يتسم بالوعي الحر و لدينا الرغبة في تقدم بلادنا , فإنه علينا بتنفيذ المهام الخاصة بنا و هي نشر مفاهيم الديموقراطيه و العدل و الحق و المساواة و الحرية بين اوساط الشباب الذي يري أن هذه المصطلحات هي مجرد شعارات كاذبه .
* إن حرب التحرير المقدسة لن تكون في صالحنا إن لم نكن عادلين مع انفسنا , و إذا أرادنا استرداد الكرامه , فعلينا بإحلال العدل و الديموقراطية أولا , و إلا .. فلا قيمة للعرب .!!
* و اخر ما اختم به هذه الرسالة , هو إنه من الواجب علينا تحرير العقول التائهة داخل دوامة أنه لا أمل في تحرير فلسطين .