الأربعاء، 18 يوليو، 2012

شريعة علمانية و مؤامرات صهيونية


مشروع الكيانات الدينية المفروض انه تطبيق الشريعة .
ودي مشكلة عندي لأني مؤمن بعلمانية الدولة.. مؤمن بإن علمانية الدولة تحمي و تضمن لكل المواطنين حق حرية الاعتقاد  : ) 
 صوت من بعيد : انت مش مسلم ولا ايه ياعم ..

الإعتراض عندي مش علي الشريعة في حد ذاتها لأني مؤمن بيها ,, انما الاعتراض علي الاشخاص اللي هيقوموا بعملية تطبيق الشريعة - شرع الله - علي المجتمع.
و تجارب الدول الدينية في العالم تخليني ادافع عن علمانية الدولة...

معنديش اعتراض علي إلغاء المادة التانية من الدستور ,, لإن المفروض ان تطبيق الشريعة من داخل الفرد نفسه مش من خلال قوانين و مواد دستورية والا كان المفروض الملايكة تقوم بكتابة الدساتير للشعوب .!

اللي مؤمن بيه هوا اني أطبق الشريعة عن فهم احسن ما أطبقها عن جهل,, و حتي لو هطبقها علي نفسي عن فهم , المشكلة مش فيها , المشكلة ف اللي بيحكم بإسمها... لإني أثق في الشريعة و فـ نفسي ولا أثق في من يحكم بإسمها.....

بالنسبة لي المشكلة بين التيارات الدينية و التيارات العلمانية... 
مش في الشريعة كدين سماوي او العلمانية كفكر انساني .. المشكلة و انعدام الثقة في المدعين بالعلمانية و حاملي رايات الاسلام السياسي...
الفريقين فيهم اشخاص غير شرفاء و بتوع مصالح ولعب ع الكراسي مش من أجل الشعب .

زي بالظبط حقوق الانسان .. امريكا كل ثانية تقولك انها تعمل علي حماية حقوق الانسان في العالم ولكن الحقيقة انها تحمي حقول الطاقة في العالم .
دا اسمه إدعاء مزيف

الصهيونية ..
ناس لسه بتتكلم فقي انها حقيقة ولا مؤامرة!! طب وبعدين ؟؟ احنا كدا واقفين عند كون انهم حقيقة ولا مؤامرة ولو قلنا حقيقة فـ برضو احنا لسه واقفين عند نقطة انها حقيقة ,, 

بقالنا اد ايه بنقول ان الصهيونية فعلا حقيقة؟؟؟؟ كتير فشخ 
انما هل أنظمة الحكم و الناس اللي عمالة تهلل بحقيقة الصهيونية و مخاطرها عملت حاجة لمواجهة الصهيونية ؟؟؟؟؟؟؟
كله هتش فـ هتش .. اي رغي ع الشعوب و خلاص وايه المانع نلعب بـ مشاعر الجماهير طالما ان دا هيجيب تأييد شعبي!!

الصهيونية تمول منظمات حقوق الانسان في مصر.
إذن حقوق الانسان صهيونية!!
النظام بـ يصدر لنا الكدبة و احنا بنصدق.. النظام اصلا صهيوني سواء في السياسة الخارجية مع امريكا و اسرائيل او في السياسة الداخلية في التعامل مع الشعب ....

وبعدين لو هنقول مثلا ان منظمة مجتمع مدني بتشتغل في حقوق العمال و ثبت بالمستندات ان المنظمة دي موجهة بالتمويل المشروط من منظمة أجنبية مشبوهة ,, هل دا معناه ان حقوق العمال مش حقيقة و الكلام عليها هوا مشروع صهيوني ماسوني من اجل هدم مؤسسات الدولة ؟؟؟؟ اكيد اللي مصدق كدا و اللي بيصدق الكلام من النوعية دي ساذج جدا لدرجة انه مش فاهم اي حاجة او يعمد انه يظهر و يدعم الكلام الفارغ ده من أجل تحقيق مصالح سياسية و عادة بتيجي من أنظمة الحكم المستبدة و المعارضة المزيفة .


حد يقول لي احنا فين من التقدم البشري ؟؟؟؟؟
حد يقول لي احنا عندنا وقت للشعارات و الكلام الفضفاض ولا احنا مستعجلين علي بناء دولة متقدمة؟؟؟؟
كل دا من أجل الصراع علي السلطة؟؟؟؟ مجتمعنا معندوش وقت انه السلطة تكون في ايد ولاد وسخة .. 

الشك مش في الأفكار .. الشك من صنع المنافقين .
عاوز تطبق الشريعة علي المجتمع؟؟ طبقها علي نفسك الأول.
عاوز تطبق العلمانية علي المجتمع؟؟ طبقها علي نفسك الأول.
بتقول إنك بتحمي حقوق الانسان؟؟ ياريت يكون معروف عنك النزاهة.