الأربعاء، 7 أبريل 2010

يا حريه فينك فينك .. امن الدوله مابينا و بينك




نظمت حركه شباب 6 ابريل مظاهره للمطالبه بتغيير الدستور و رفع حاله الطواريء المعمول بها منذ عام 1981 وقد كنت من ضمن المشاركين في المظاهره وماسيتم كتابته هو بالفعل ما حدث :

في الساعه الثانيه عشر ظهرا كنت متوجه مع مجموعه من اصحابي الي ميدان التحرير و قد كان شبيه الثكنه العسكريه , فلا تري امامك غير لبس الامن المركزي و عربيات الامن المركزي و انتشار مكثف لمخبرين و امناء امن الدوله و الشرطه في كافه شوارع وسط البلد .

المهم بقدره قادر نجحنا في الدخول لمكان المظاهره امام مجلس الشوري , وكان العدد حوالي 400 او 300 ناشط سياسي و عشرات المواطنين المطالبين بنفس المطالب , وفوجئنا بكردون امني كثيف علي مكان المظاهره وابتدت الحكايه ..

اي مظاهره في العالم بيبقي الامن موجود عشان حمايتها و تأمينها .. انما في مصر الوضع مختلف كالعاده ..! فالامن المركزي مكانش بيعمل غير كام حاجه : خطف المتظاهرين بعد طبعا الشتايم و الضرب المبرح من العساكر و الظباط .

وتم اختطاف اكثر من 85 ناشط سياسي من امام مجلس الشوري بعد سحلهم في الشوارع و ضربهم بالهروات , لا و ايه الضرب كان عام ومفيش تفرقه بين ولد و بنت .. بين راجل و امراءه .. بين كبير و صغير .. كله بيضرب ..!

وانا شايف خمسه من اصحابي بيتضربوا و بيتخطفوا من قدامي و انا مش قادر اعمل حاجه و واحده صاحبتنا اتضربت لما قالوا هما يا بس ..

تحرش جنسي تلاقي ..شتايم تلاقي .. سب الدين تلاقي .. اكن المتظاهرين دول بيطالبوا بانتشار المخدرات مثلا ولا بالفساد ولا بأي حاجه وسخه ..!

كان في ظابط امن مركزي عمال بيخطف في الشباب و انا كنت واقف ساكت فبقوله علي فكره احنا مصريين زيكم مش من حته تانيه لاقيته ابن الكلب بيقولي لأ احنا بقي مش مصريين !!!!!
ماهوا فعلا يبقي عار علينا لو انت مننا يا كلب .
المهم الوقفه اتفضت و الللي اتضرب اتضرب و اعتقل اعتقل و مشينا , دخلنا ميدان طلعت حربلاقيناه فاضي من الناس المصريين .. مجرد عربيات امن مركزي و مخبرين و ظباط امن دولة!! ومفيش ناس .
الناس في مقر حزب الغد كانوا محبوسين هما و ايمن نور و ابنه اتضرب و اتعور في رقبته و كان هيتاخد .!!
حاولنا نهتف لاقينا المخبرين و الامناء الغير متعلمين بالتأكيد واللي بيشربوا حشيش دول اكيد عارفينهم اصلهم منطورين في البلد كلها بياخدوا فلوس من اي حد مش علي مزاجهم .!! المهم لاقيناهم جم علينا جري و عمالين بيشتمونا سواء ولاد او بنات !!!!! و مشينا .!

اليوم انهارده كان في احداث كتير مؤسفه و لكن الظاهر ان الضرب المبرح بينسي !!
ابشع المواقف اللي شوفتها هيا البنات وهما بيتضربوا و بيتحرشوا بيهم ومش مكسوفين من الناس اللي بتبص عليهم
كمان منظر اصحابي و هما بيخطفوهم .. حاجه تقرف بجد


و احب افكر الناس اللي بتتفرج علي المدونه و الاوساخ اللي مراقبنها ان مطالبنا دي لو اتحققت فهيا خير لينا و ليكم .



طب امن الدوله كلاب الدوله .. هما كلاب و احنا الدوله


مــــصــــر مفيهـــــاش حــــــــــــــــــــــريـــــــــــه