السبت، 31 يوليو 2010

اللي بني مصر مكانش حلواني


اللي بني مصر كان في الاصل حلواني وعشان كدا مصر يا ولاد حلوه الحلوين.!!
و هكذا كانت دي مقدمه مسلسل بوابه الفكهاني اللي اتكلمت عن مصر في فتره الخديويه و عبده الحاموولي و ألمظ و احمر و اسمر .!!

طب اللي كتب كلمات الغنيوه الحليوه دي كان عاوز يقولنا ايه ؟؟!!! ان مصر اللي هيا حلوه الحلوين دي , مصر الشعب ولا مصر الدوله ولا مصر البلد ولا مصر الحكوووومه ؟؟؟؟؟!!!

لو مصر الشعب فكان زمان مصر فعلا حلوه الحلوين .!!
لو مصر الدوله ف عمرها ما كانت حلوه الحلوين .!!
لو مصر البلد ف هيا اصلا حلوه الحلوين .
اما بقي لو مصر الحكومه ف تـــــــيـــــــــــــت .!!!!

انتا يا عم مفيش حاجه عجباك ابدا ؟؟!!! اه ياعم مفيش حاجه عجباني .!! ماهو اصل لو في حاجه تعجب الواحد كنت قولت عليها انما مفيش ولامؤأخذا ..!!!

اصل انتا لو تعرف اللي فيها كنت عذرت كلامي دا ..!! كلام ايه ؟؟ كلام ان التلاتين سنه خرا اللي فاتوا دول البلد و سياستها و حكوماتها عملوا فينا عمايل يا جدع ..!!! عملوا ايه ما تقولي ؟؟

لا ابدا كل الحكايه ان احنا شعب اتضحك عليه .!! ايوا احنا اتضحك علينا لما قالوا انها ثوره و هيا كانت انقلاب عسكري .!!
اتضحك علينا لما جمال عبد الناصر حدد اقامه محمد نجيب علشان الاخير كان عاوز ان الظباط الاحرار يرجعوا مكانهم تاني و هوا الجيش و يسيبوا السلطه و الحكم للدوله و يرجع استقلال الدوله و قضائها من تاني .!!
اتحدد اقامته علشان بس كان عاوز مصر تبتدي طريق الديموقراطيه من الاول , بس للأسف احنا نزلنا علي الطريق الدائري من نصه ومفيش حاجه تودينا .!!

اتضحك علينا لما جمال عبد الناصر استمد شرعيه حكمه للبلد بالكلام عن فلسطين ايام لما كان في عروبه بجد .!!
اتضحك علينا لما الاخبار و الاذاعات طلعت علينا يوم 5 يونيو 67 تقولنا ان الجيش المصري اسقط 100 طياره للعدو .!! و الحقيقه ان العدو دغدغ الطيارات بتاعتنا و هيا علي الارض .!!

ماتفهمش كان المذيع ساعتها مبرشم ولا ايه ؟؟؟؟؟؟

مـــات عبد الناصر بعد خساره فلسطين و القدس , وبعد انهيار العروبه ,و بعد انحراف جهاز المخابرات , وبعد طحن المعارضه و زوار الفجر .!!

و جه عصر السادات .!! و اتضحك علينا تـــاني لما راح فلسطين المحتله (اسرائيل) و اعترف بيها .!! و عمل معاهده سلام مع الكيان الصهيوني من طرف واحد و بشروطهم هما .!!!!!

حرب 73 اللي معداش عليها 10 سنين و عمل اتفاقيه سلام مع الصهاينه .!! اللي مصر كانت اكبر بلد حاربتهم .. اللي مصر كانت اكتر بلد ضاع منها رجاله و شباب زي الورد في الحروب ضدها .!!

اتضحك علينا بعد اتفاقيه السلام لما العرب قاطعونا .!! ماهو لازم يقاطعونا مش احنا مصر ام الدنيا .!! اكبر بلد حاربت اسرائيل و اللي كانت دايما متصدره الحروب ضدها .!! عاوزين ايه لما الأم تنام ؟؟؟؟ اكيد ولادها هايناموا زيها .!!

سنه 79 كانت اتفاقيه السلام بين مصر و اسرائيل ..!
سنه 84 كانت سنه فك الارتباط بين الاردن و الضفه الغربيه .!!
يعني احنا ابتدينا الهبل و الدول اخدتنا حدوه ليها في الهبل .!!!!

اتضحك علينا لما قالوا انـفـتـــــاح ..! وهيا اصلا كانت تبعيه .!! و بس .. مخدناش من الانفتاح الا ان الشباب ساب البلد و الاراضي الزراعيه اتجرفت و بقينا نستورد قطن من بره .!! علشان احنا جوا .!!!!

واتـقـتل السادات .!! اتقتل يوم ذكري حرب اكتوبر المجيده اللي بعديها ب 6 سنين خلاها حرب اكتوبر العقيمه .!!

و اتضحك علينا تــــالت لما الرئـــــــــيـس حسني مبارك طلع في مجلس الشعب و قالك : ( نحن حريصون جدا علي تداول السلطه وانا لن استمر في حكم مصر اكتر من فترتين , و نحن حريصون علي ارساء قواعد الديموقراطيه في مصر بلد الامن و الامان ).!!!!!

طب هوا كان يقصد بتداول السلطه دي ايــه ؟؟!!! قصده يعني تداولها من ايده اليمين لأيده الشمال .!!

و كان يقصد ايه بقصه انه لن يستمر بحكم مصر لاكتر من فترتين ؟؟؟؟؟ مع انه مشرف معانا بقالو 30 سنه يعني خمس فترات و السادسه يا هوا يا ابنه .!!!!
ولا كان قصده فترتين واحده صباحي و التانيه مسائي زي التعليم .. اللي باظ .!!

بلاااش دول .. كان يقصد اييه بقي لما قالك ارساء قواعد الديموقراطيه.!! مع ان احنا مش بنشوف الا نوعين بس من القواعد .!! قواعد امن مركزي علي كل مظاهره مع زياده في نسبه التعذيب من قبل جهاز ارهاب الدوله .!! او قواعد امريكيه علي الحدود عندنا .. جوا بلدنا يعني .!!

اتضحك علينا كمان لما قالوا انه يتم دراسه قانون ارهاب ليأتي بدلا من قانون الطواريء .., و احنا بقالنا 30 سنه لسه لحد دلوقتي ماشوفناش المخفي علي عينه قانون الارهاب .!!
ازاي رجاله و مثقفين و مفكرين و قاده الحزب الحاكم مش عارفين يوجدوا بديل لحد دلوقتي ؟؟؟؟ ولا هوا علشان تحموا كرسي الرئاسه ؟؟؟؟؟؟ اااااه عرفت انا بقي ليه مفيش قانون ارهاب .!! ااااه يا ولاد التيييييت .!!

اتضحك علينا برضو لما تكون خمس فترات رئاسه ب خمسه و عشرين سنه و احنا في التلاتين اهو.. و كل مره يحصل فيها انتخابات تتطلع النتيجه 99,9 % .!!!!!!

و طبعا مش هاقول احنا اتضحك علينا و اخدنا علي قفانا اد ايه في موضوع فلسطين .!! و الناس عارفين .!! بس نايمين .!!

اتضحك علينا لما استقبلنا وزيره الخارجيه الاسرائيليه السابقه تسيبي ليفني و كان الغرض الحيقيقي من قدومها لمصر , اعطاء الاوامر بغلق معبر رفح علي غزه علشان في خناقه كبيره هتقوم .!! بس للأسف مكانتش خناقه .. دي كانت مجزره في حق شعب محاصر .!!

اتضحك علينا في الاعلام الحكومي لما يطلعلنا وزير خارجيه يقول ان حركه حماس بتنفذ مخطط ايراني وذلك لغرض في نفس ايران انها عاوزه ليها دور اقليمي في المنطقه .!!!!! ايــه سـفـن ايــه وش .!!

بصراحه عالم بجحه .!! يعني لا عاوزين اي بلد يبقي ليها دور اقليمي ولا عاوزين بلدنا يبقي ليها دور اقليمي .!! مع ان الدور السادس احلي بكتير و بحري .!!
عاوزه دور اقليمي يا حكومه ؟؟؟ اقفلي السفاره الاسرائيليه مثلا ولا اطردي السفير الاسرائيلي ولا حتي اقطعي العلاقات الدبلوماسيه مع اسرائيل وافتحي معبر رفح خلي اخواتنا في غزه يتنفسوا شويه .!! ولا انتي يا حكومه فالحه ف قطع علاقتك بالشعب .. والحق .. والعدل .!!

في الحقيقه يا جماعه احنا شـــعــب اتضـحـك عليه بما فيه الــــكــفـــايـــه .!!

لأ ولسه الحكومه و نظامها الفاسد عاوزين يضحكوا علينا الضحكه الكبيره لما ينـفـذوا مخطط الهروب الكبير( الخروج الآمن ) و مخطط الــتـــوريــث .!!!!!

هي معادله بسيطه جدا :-

حكومه فاسده بتألـش علي شعب غلبان..
اكيد هايخرج لنا خطه مش منطقيه.. ماتخرش الميه .!!
دخلهم يا حسين .!!

و لـلـرغـي بـقـيـه .

الجمعة، 30 يوليو 2010

الدوله و الاسلام .. و الالحاد

مش عارف ابتدي الموضوع منين ؟؟ من هنا و لا من اول الشارع .!! اصل انا كنت نسيت المدونه , بس اللي خلاني اكتب تاني قصه الملحدين و موضه الألحاد اللي انتشرت بين الشباب الحلو .!!

يعني ايه ملحد ؟؟؟؟؟ في رأيي يعني شخصيه هابله .!! تاهت في اعماق التفكير عن اصول الحياه و مدي الفكره و ان العقل يتيح للانسان انه يفكر في اي هبل ..... شخصيه مش مقتنعه بوجود ربنا .. الله .. خالق البشر و خالق الحياه , الدنيا , الأخره .
ممكن اكون نسيت كلام بس دا اللي فاكره دلوقتي .!!

الملحد في نظري مقتنع ان اللي خلقه و العياذ بالله .. هو عقله او انه اتخلق من فكرته هوا ...... ماتفهمش ايه بالظبط اهو اي هبل بيتقال .
بس اللي قادر اني احدده انهم معترفين بعدم وجود ربنا و الكلام دا من ناس انا قابلتهم ولاقيتهم بيقولوا كل حاجه ممكن ومش ممكن و احتمال و العقل و الكبد و السكر و ألـش السنيين ...

ما علينا لأني مش بحب اعملهم حيز في دماغي , ندخل في نقطه الدوله و الاسلام و رأي الملحدين في الدوله .. اللي علي مزاجهم .

لما ربنا انزل الاسلام علي سيدنا محمد صلي الله عليه و سلم .., ونزل القرآن الكريم , مكانش نازل علشان انه الكتاب السماوي الخاص بالديانه الجديده و خلاص .!! القرآن _ الكتاب السماوي غير المحرف_ نزل بهدف تصحيح صوره الحياه الانسانيه لدي البشر اولأ ..بمعني
ان اخر الديانات السماويه _الاسلام _ هو المنهج السليم للحياه و التنظيم الاساسي لأمور البشر الحياتيه في جميع المجالات .

يعني القرآن موجود فيه : شكل حياه البشر السليمه - شكل الدوله السليمه الصحيحه - المعني الاساسي للحريه - الدلائل علي وجود ربنا - الشكل الصحيح للايمان بالله - الطرق الاساسيه لعباده الله - الدلائل الكـــثـــيـــره عن احتــــــرام الطوائف و الفئات الاخري (غير المسلمين وعدم المساس بهم - المرأه و حقوقها - الرجل و حقوقه ) .

وحاجات تانيه كتير موجوده في القرآن بس اللي ذكرته ده هوا الجزء المخصص و المعني بالمقاله دي .!!

1- شكل حياه البشر :
يعني مثلا الزواج , هو تزاوج رجل ما من امرأه ما .. يعني مش شغل شواذ و العياذ بالله , راجل مع راجل و ست مع ست و الكلام اللي انا و انتوا عارفينه .!! مايجيش بقي واحد ملحد مشكوك في اساسه يقولنا انه عادي موضوع الشواذ دا و ان دي حريه و محدش ليه دعوه و ان ربنا هوا اللي هايحاسبنا .!! لأ في دي بقي لأ .!! القرآن وهو المشرع الرئيسي و الاساسي للحياه مش موجود فيه الكلام دا , بس موجود فيه عقوبه اللواط .!! دا اللي احنا عارفينه . وموجود فيه معني الحريه السليم مش المعني اللي يبيح اي حاجه مهما كانت .. دي مش حريه يا جماعه . مش في نظري .. دا القرآن بيقول كدا .

2- شكل الدوله السليمه :
اول حاجه كدا انا اؤيد فكره الدوله الاسلاميه .!! الدوله الاسلاميه السليمه الصحيحه اللي كانت موجوده ايام سيدنا محمد صلي الله عليه و سلم و ايام خلفاؤه الراشدين .
دي كانت دوله اسلاميه سليمه بتنفذ القرآن بالحرف الواحد دون التحريف في اساليب الحكم او المساس بأي طائفه او فئه او أقليه.. مثل ما جاء بالاسلام و القرآن وما اقره الله سبحانه و تعالي علي البشر اجمعين .

الاسلام ينفي و يحرم المساس و اعمال الاذي و الحاق الضرر بالفئات و الطوائف و الاقليات المقيمه علي اراضي الدوله الاسلاميه طالما ينفذون قوانينها .. اللي هيا قوانين الاسلام .. اخر الديانات السماويه .. دين الله سبحانه و تعالي .

الاسلام ضمن حمايه غير المسلمين و اقرها علي المسلمين , و نجحت الدوله الاسلاميه فعلا و نجحت في تطبيق شريعه ربنا و حمايه الطوائف و الاقليات الاخري و نجحت في التعايش مابينهم ... و ازدهرت الدوله الاسلاميه و اتسعت اراضيها بفضل الله سبحانه و تعالي
و بتنفيذ الشريعه الاسلاميه دون التحفظ او التعصب او الاخلال بها.

نيجي بئا للكلام المفيد ..: المعروف طبعا ان بعد مقتل علي ابن ابي طالب رضي الله عنه , ابتدت الدوله الاسلاميه تخرج عن اساسها و كان في سنوات ضعف و سنوات قوه و ايمان بس دا مكانش بسبب الدين او وجود اخطاء بالعقيده الاسلاميه لا سمح الله ,, انما كان نتيجه لوجود اخطاء و سلبيات و ضعف ايمان بالقائمين علي الدوله الاسلاميه وليس بالاسلام , يعني اخطاء بشر و ليس اخطاء في الدين الاسلامي .

مايجيش بقي واحد علماني و لا ملحد يشكك في الاسلام و في سبب وجوده و يقوللي الاسلام دا دين بس و مالوش علاقه بالدوله و السياسه , وان الايمان في القلب فقط ... اه ماحنا عارفين ان الايمان في القلب بس برضو الدين و خاصه الدين الاسلامي موضوع النقاش ليه علاقه كبيره بالدوله ...... اصل لو مكانش ليه علاقه مكانش هايبقي فيه دوله اسلاميه في الاول من اساسه .!! ولا اييييييه ؟؟؟؟!!

الدوله المدنيه المصريه حاجه و الدوله المصريه العلمانيه حاجه تانيه خاااالص :
نتكلم بقي عن الواقع و واقعنا دلوقتي بيقول انه فعلا مفيش علي الساحه العامه المصريه ناس بتنفذ الشريعه الاسلاميه السليمه علشان نخليهم قاده لدولتنا و نقيم الدوله الاسلاميه .. الدوله الاسلاميه عمرها ما هتقوم بثوره ناس ايمانهم بالله ضعيف .

واقعنا بيقول انه احنا في دوله بتحكم بالقانون و الدستور .. ماشي ياعم مش هتكلم ف النقطه دي .. بس ماتجيش تقوللي مفيش حاجه اسمها حرام و حلال ..! اقولك ايه سفن ايه علي طول .!!

العلمانيين و الملحدين في نظري متفقين في موضوع المواطنه , يعني بالنسبه لهم عادي كيك ان يبقي في ف وسطنا ناس ملحده و ناس شواذ و سحاقيات و اهو كله زي بعضه .!! لأ بئاااا كله مش زي بعضه و مفيش حاجه اسمها ان محكمه تجوز اتنين رجاله او اتنين ستات من بعض و تقوللي حريه شخصيه و حريه اعتقاد .!!!!!!!! اقولك انا ساعتها تييييييييييييت .!!!!

هتقوللي حريه هقولك ربنا راضي عن الحريه دي ؟؟؟؟؟ ازاي ؟؟؟؟؟ ماهو ربنا اكد علي تحريم الحاجات المقرفه دي يبقي ازاي تقوللي حريه .!!! اذا كانت دي حريه في نظرهم , ف دي اسمها المعني الخاطيء للحريه .

وبعدين الدول العلمانيه اللي الملحدين و العلمانيين بيفتخروا بيها , دخلت و خاضت و اتسببت في حروب علي اسس دينيه .!! امريكا مثلا , حد يقدر ينكر انها دخلت في حروب علي اسس دينيه !!! حد يقدر ينكر انها متحيزه جدا لاسرائيل و هي دوله احتلال قائمه علي اغتصاب اراضي الغير و قايمه بدستور متطرف و ان المتطرفين اليهود هما المتحكمين فيها هما و الصهاينه الملعونين !!!! حد يقدر يقولي ان الدول الغربيه العلمانيه دي مافيهاش تطرف ديني و عنصري ضد الاسلام و المسلمين مع ان هما اقليه و ليس لهم تأثير !!!

الرجاله اللي اسمهم بس رجاله المؤمنين بالعلمانيه و الاشتراكيه و الرأسماليه و جميع الايديولوجيات الاخري و متحيزين ليها بطريقه مستفزه احب اقول لهم حاجه واحده بس :::: ازاي انتا مؤمن و مقتنع بفكر اسسه واحد من البشر , مع ان الاسلام منزل من عند الله سبحانه و تعالي ؟؟؟؟؟؟؟ ازاي بئااااا ؟؟؟؟؟؟ هل الايديولوجيات دي احسن من الاسلام يعني ؟؟؟؟؟؟
احب اقولهم احنا في مصر و العالم العربي _مسلمين و مسيحيين_ عايشين في وسط مجتمعات ذات طابع قائم علي التقاليد و العادات الشرقيه , فا متجيش تقوللي بقي الحاد و علمانيه و ألـش رخيص علشان انتا و انا و كلنا و كلهم عارفين ان الناس البسيطه عمرها ما هترضي بالهبل اللي في دماغكوا .!!

حـــــاجــه اخــيــره كاتمها من بدري : حاول تقرب من ربنا .. ربنا اللي انتوا شككتوا في وجوده يمكن يغفرلك و اكيد هايغفرلك اذا كانت التوبه سليمه و انه مفيش هبل تاني و خرافات زايفه مبنيه علي كلام فارغ

ربنا يتوب عليا و عليكوا .