الأربعاء، 10 نوفمبر، 2010

عاوز تعرف مين هيا مصر ؟؟ اسمع الأغنيه دي

هـلـل .. انا عـربـ(ـج)ــي


رسالة حقيقة أبلغ فيها كل العالم و خصوصا العالم العربي ..وأطلب منهم انهم يغيروا من ثقافتهم و بالذات ثقافة التهليل اللي كتير من الشباب العربي واقع فيها و فاكر ان بالتهليل دا يبقي هوا كدا صح .
طريقة تفكيرنا يا جماعة لازم تتغير ..
يعني في فرق بين نشر الحقيقة .. و الشماتة .!!
و في مليون فرق بين نشر الحقيقة .. والتهليل .!!!
بمعني اني لما أنشر خبر عن بلد تانية لازم اقف ع الحياد , والا يبقي انا بحشر نفسي في اللي مليش فيه ....

1- إشـمـعـنـي مــصــر :-

* اشمعني مصر لما ينزل خبر سيئ عنها , كل الدول بتهلل ؟؟!
* اشمعني مصر لما بتغلط , كل الدول بتتمني انها تشارك ف عقابها ؟؟!
* اشمعني مصر لما كانت محتضنة العالم العربي كله .. كان في عرب معترضين ؟؟! و لما مصر سابت العالم العربي لحاله ..هما هما نفس الناس اعترضوا علي كدا ؟؟!!!
* اشمعني مصر لما بيتعرف عنها الفساد كل الدول بتهتم بالموضوع ؟؟! ولما بيتعرف عن بلد عربية تانيه الفساد و الانقسام الداخلي و الطائفية و عدم وجود دولة حقفيقية تمارس سيادتها , و تيجي مصر تهتم بالموضوع ..كل الدول العربية تهلل و تقول هذا تدخل في الشأن الداخلي !!

** طب يا تري كل اللي فات ده دليل علي حب العرب لمصر .. ولا دليل علي ان العرب متغاظين من مصر ..! و دليل علي ان (المصلحة) عندهم عمالة بتفتح و بتقفل بسبب مصر ؟!! و المعني ف (مصلحة) الشاعر ..!

2- من المحيط للخليج :-

* انا ضد التطبيع و مش موافق تماما علي المحاولات البائسة من قبل نظامنا الفاسد للتطبيع مع الكيان الصهيوني .. بس في حاجه هيا اني :
* عمري ما هللت لما عرفت إن بلد عربي آخر واخد اسرائيل قدوة ليه !!
* عمري ما هللت لما عرفت إن بلد عربي آخر يسمح بإقامة مشاريع علي أراضيه يتم تمويلها من إسرائيل !!
* عمري ما هللت لما عرفت إن في قادة عسكريين من دول عربية خانوا بلادهم و هاجروا لإسرائيل و عايشين هناك .!!!
* عمري ما هللت كل يوم و انا بشوف أجهزة الأمن في بلد عربي آخر كل يوم يقبضوا علي عشرات الجواسيس اللي بيشتغلوا لحساب أسرائيل ..!!!

** طب بعد كل ده يبقي مصر بس هيا البلد الوحيدة المطبعة مع أسرائيل ؟؟! ولا كل الدول العربية بلا استثنـــاء مطبعه هيا كمان !!

3- فوارق في طبيعة كل مجتمع عربي :-

* بالتأكيد نظامنا فاسد و عميل , ودا اللي مخلي الناس في مصر مؤمنة بقوة التغيير وأهميته ...و برضو في أنظمة عربية فاسدة و عميلة .. بس للأسف انا مش شايف ان شعوب الأنظمة دي عندها الجرأه انها تطالب بالتغيير زي مابنعمل ..في مصر !!
* الكل عارف ان مصر بتصدر الغاز لإسرائيل .. بس الحمدلله معندناش حاكم اخد طيارته و راح علي إسرائيل و بلغهم بميعاد حرب 73 زي ما عمل الملك حسين ملك الأردن في وقتها -مع العلم إن السادات كان عارف انه خاين و عميل و بلغه بميعاد غلط ..نيااهاا
بس للأسف الدول العربية ما هللتش علي اللي عمله الملك حسين زي ما هللت لما السادات اعترف بإسرائيل .. و إسترد أرضه .!!

* عندنا سفاره إسرائيلية في القاهرة .. بس الحمدلله معندناش قائد رفض فكرة المقاومه المسلحه ضد اسرائيل زي ماهو حاصل مع موقف محمود عباس رئيس السلطة الخضرا الفلسطينية .
* و عندنا سفير لمصر في إسرائيل .. بس الحمدلله معندناش أي جهاز أمني تم تدريبه علي أيدي القوات الأمنيه الإسرائيلية زي ماهو حاصل في الضفة الغربية ..!
* كان عندنا وزراء استقالوا من الحكومة أيام السادات لما وافق انه يتفاوض مع إسرائيل .. بس الحمدلله مكانش عندنا قادة عسكريين سابوا الحرب الأهلية و خانوا بلدهم و راحوا يعيشوا في إسرائيل زي ما عمل أنطوان لحد و سعد حداد لما خانوا لبنان و هربوا علي إسرائيل ..و إرجعوا للتاريخ وهو يقولكم ..!

* كان عندنا عبدالناصر اللي قال ( لا صوت يعلو فوق صوت المعركة ) .. بس الحمدلله مكانش في عملية اغتيال مدبرة لعبد الناصر من داخل النظام المصري ..زي ماحصل في لبنان و تم إغتيال رفيق الحريري من خمس سنين و لحد دلوقتي مفيش أي مواطن لبناني عارف مين اللي قتله ..!
* كان عندنا عبد الناصر اللي حارب في 48 و إتحاصر في الفلوجة و دافع عن فلسطين و الدول العربية .. بس الحمدلله عبدالناصر عمره ما رصد ملايين الدولارات لإغتيال أي قائد عربي , زي ما عمل ملك السعودية وقتها و كان مخصص أكتر من خمسين مليون دولار لإغتيال جمال عبد الناصر ..!

** ياتري الــبــلاوي دي كلها مش برضو تستاهل التهليل ؟؟!
** بس معلش احنا نصيبنا إننا شعوب عربية ..بناخد بالشكل و نسيب المضمون .. و علشان كدا احنا بنهلل كتير لما بلد تقع فيها مصيبة .!!
و أعتقد إن الشاعر الفلسطيني محمود درويش لو كان عايش في أيامنا دي .. كان غير إسم قصيدة ( سجل انا عربي ) وخلاها بإسم ..
( هـلـل .. انــا عــربــجــي ) ..!

الاثنين، 8 نوفمبر، 2010