الخميس، 23 سبتمبر 2010

طــبــق كــحــك


قبل أي شيء و بعد أي شيء, كل سنه و أنتم طيبين بمناسبة عيد الفطر المبارك واللي مكانش عندي الوقت اللي اقولكم فيه .. كل سنه و أنتم طيبين , و علشان كدا قررت اكتب تدوينه بأسم "طبق كحك".

بس طبق الكحك دا غير الاطباق اللي عارفينها و بناكل منها !! طبق مثير للحروب اللي غيرت كتير جدا في الخريطه السياسية للعالم العربي , و شكلت جغرافيا سياسيه جديده قلبت الموازين في الشرق الأوسط .

طبق الكحك اللي اقصده فيه اتنين و عشرين كحكة , و كل كحكة من دول غنية بالفيتامينات الاقتصاديه و البشرية و السياسية دا غير طبعا الكحك الغني بالفيتامينات الاقليمية - موقع الكحكة و دورها في التأثير علي باقي الكحك !!

مش هاتكلم علي كل الكحك اللي موجود في الطبق و دا لأن في كحك دوره الوحيد انه يتاكل بس .!!
تعالوا نبدأ الحكاية من الكحكة الكبيرة اللي انا عايش فيها .

اول كحكة :- مصر :

مصر تعتبر بلد كبير من حيث المساحة و بلد مهم جدا من حيث الموقع الجغرافي , و التحكم فيه يؤدي الي التحكم في معظم الخريطه السياسيه في الوطن العربي - الشرق الاوسط .. سموها زي ماتسموها !!

المهم ان بعد وصول السادات للحكم و بعد تحويل مؤشر سياسات الدوله من امام الاتحاد السوفيتي الي الوقوف امام محطه الولايات المتحدة , وبعد معاهده السلام " الوسخه" و بعد الانفتاح الاقتصادي غير المدروس , و بعد وصول الخاين مبارك للحكم , اصبح اي قرار سياسي علي المستوي الداخلي و الخارجي لابد من موافقة امريكا عليه , و الموافقه دي مترتبه علي مصالح امريكا مش مصالح مصر

فكان الشكل كالآتي :
معونه امريكيه + تطبيع شامل مع الكيان الصهيوني + عدم ادراج مصر علي قائمه الدوله الراعيه للارهاب +مساندة مصر ضد اي موقف عربي مخالف للسياسية الامريكيه المعمول بها في مصر + عدم مطالبة مصر بإلغاء قانون الطواريء + السكوت عن انعدام الديموقراطيه في مصر + تدفق الاستثمار الاجنبي علي مصر في مقابل ضرب الاقتصاد الوطني + عمليات الخصخصة الممنهجه = يــســـاوي =
وضع مصر من تلاتين سنه .!!

دا حاجه و الفتنه الطائفيه حاجه تانيه خالص :
ظهرت مؤخرا مشكلات الفتنه الطائفيه بين مسلمي و مسيحي مصر - اقطاب الوحده الوطنيه - ابناء الوطن الواحد .
بالطبع شيخ الازهر و بطرايرك الكرازه المرقسيه قالوا ان مفيش فتنه طائفيه , بس الحقيقه ان المصريين مسلمين و مسيحيين عايشين علي نار الفتنه دي , يعني الفتنه اصلا موجوده بس الحكومه بتداريها بالتصريحات مش اكتر .!!

مش بعيد انها تكون بسبب قوي خارجيه هدفها ضرب الاستقرار في البلد - اللي مش موجود اصلا - و ممكن تكون بفعل قوي داخليه هدفها إشغال الرأي العام عن بلاوي اكبر من كدا مع ضرب الوحده الوطنيه , اللي بقت شعارات بس .!!

يبقي الوضع كالآتي :

1- نظام فاسد تتبعه حكومه فاسده , ترعي مصالحها فقط علي المستوي الداخلي و ترعي المصالح الامريكية علي المستوي الاقليمي , لأنه الحفاظ علي مصالح امريكا في الشرق الاوسط يعتبر دعامه لحفظ نظام الحكم الفاسد و تأكيد استمراره و بقاؤه في سدة الحكم .

2-فتنه دينيه بين المسلمين و المسيحيين تؤدي الي متاهه كبيره في البلد , تؤدي الي انتشار الفوضي و اعمال العنف علي كام عمليه ارهابيه بهدف التخريب , هوب يطلعلك بعديها كام تصريح يقولك ان مصر فيها ارهاب , هوب بعديها بشويه امريكا تقولك الحرب علي الارهاب , بعديها وش القوات الامريكيه توصل القاهره و نتقلب عراق جديد !!
و بكدا يكون سيناريو السيطره علي اكبر كحكة موجوده في الطبق اترسم و في طريقه للتنفيذ .

لو الكلام دا خيال , فممكن يتحول لواقع في كام يوم مش اكتر .!!

*********

تاني كحكه :- السودان :

نكته بالسوداني :
اتنين سودانيين قاعدين مع بعض و دار الحوار التالي بينهم :
الاول : تصدق يا زوول ان عبد الناصر مات من كتر الهموم !! التاني : طب ادامت هوا مش اد الهموم بيستهما ليه !! نيااهاا

نرجع للكحكه السودانيه:

من زمان قوي و السودان واقع في داومه الانفصال و شريكي الحكم و محاولات السيطره علي الاقاليم الغنيه بالنفط .
دول تدعم الانفصال و دول تانيه تدعم الوحده الوطنيه , المهم ان العمليه السودانيه رسيت علي حق تقرير المصير لجنوب السودان عن طريق الاستفتاء الشعبي اللي هايحدد اذا كان السودان هايتحول الي دولتين شماليه و جنوبيه ولا الوضع هايفضل زي ماهوا .!!

* المحكمه الجنائيه الدوليه اصدرت مذكرة توقيف بحق الرئيس السوداني عمر البشير لارتكابه جرائم حرب في اقليم دارفور , و البشير خايف جدا بس مش عاوز يقول انه خايف !! كل شويه يعمل زيارات لدول افريقيه معينه , يقعد كام ساعه و هوب تلاقيه اختفي و رجع علي السودان .
* الامم المتحده قالت انها تدعم حق تقرير المصير و ضرورة الاستفتاء الشعبي .
* امريكا قالت ان انفصال الجنوب السوداني امر حتمي لابد منه .
* مصر طبعا مش عاجبها الكلام اللي قالته الحيوانه امريكا لأن انفصال الجنوب يؤدي الي خلق دوله اخري قد توافق علي ما اقرته الدوله الافريقيه الخمسه بأنها غير ملزمه بأي اتفاقيات استعماريه سابقه بخصوص حصة كل دوله من مياه النيل و المتنازع عليها بين دول المنبع و دول المصب .
دا غير اننا في مصر نعاني من خطر الفقر المائي فلازم مصر تكون واقفه جمب عدم انفصال الجنوب السوداني .!!
المامبو السوداني ..!

***********

تالت كحكة :- الصومال :

صعبان عليا يا صومال و انتا حالك يسر عدو ولا يسر حبيب !!

* الصومال دوله ممزقه و منقسمه بين حكومه انتقاليه ضعيفه و بين ميليشيات شباب المجاهدين الاسلاميين .
كله بيضرب ف بعضه و كله عاوز يوصل للحكم بأي طريقه .
كله بيلعب علي الدين و السياسه و استضعاف الشعب الصومالي , مع ان الصومال بلد غنيه من ناحيه الموارد الطبيعيه , و الدليل علي كدا هوا وجود شركات اجنبيه دخلت في اتفاقيات مع الحكومات السابقه الهدف منها هو استئجار اجزاء كبيره من الساحل الصومالي .. الغني بالثروه السمكيه , اللي يمتلكها جارنا الصومالي .

و كلنا عارفين ان عمر ما في شركه اجنبيه هتخاطر بنفسها و تدخل بلد عارفه انه واقع في صراعات و اشتباكات مسلحه الا اذا كان البلد دا فيه كنز لطيف مدفون جواه .!! بس القراصنه الصوماليين ولاد التيت مش عاتقين حد !! اي مركب معدي يضربوا عليه نار حتي لو المركب دا رافع علم الصعيد الجواني ..!

عموما القوي الاستعماريه عماله بتاكل في كحكة الصومال و احنا - العرب - بناكل في سد الحنك .!!

**********

رابع كحكه :- اليمن :

بعيد عن موضوع الكحكه , مرة الرئيس اليمني علي عبدالله صالح قال : انا استطيع ان احارب حتي اخر جندي مصري .!!
كله بيحكها فينا مش عارف ليه ..!

المهم : كلنا شوفنا الحرب السادسه اليمنيه بين شمال اليمن المتمثل في الحكومه و الجيش , و بين جنوب اليمن المتمثل في الحوثيين , ست حروب دارت و كل دا علشان الناس في اليمن برضو واقعين في دوامة الانفصال
اللي لفت نظري ساعه الحرب دي , التصريحات اللي كانت بتطلع !! اللي يقولك الحوثيون دول ارهابيين و ان مقاتلي القاعده موجودين في جنوب اليمن بيقاتلوا مع الحوثيين , و اللي يقولك لأ , ايران هيا اللي بتدعم الحوثيون بإعتبار انهم شيعه زي بعض ....!!!!!

و سواء كانوا شيعه و ايران بتدعمهم ولا سنه و القاعده بتحارب معاهم , المهم انهم في نظر امريكا ارهابيين يجب القضاء عليهم تحت بطانيه الحرب علي الارهاب .!!

من ضمن التصريحات اللي فقعتني , ان امريكا قالت انها تدعم وحده اليمن , و انها مستعده لمسانده اليمن في الحرب علي الارهاب .. هوب بعديها علي طول اليمن قالت ان الحرب في الجنوب تقوم بها القوات اليمنيه ولا دخل للقوات الامريكيه المرابطه في خليج عدن بذلك .!! طب هوا حد قال ان امريكا اتدخلت .....!
شويه و الحرب لسه شغاله , طار وزيرنا الخفيف احمد ابو الغيط هوا و عمر سليمان رئيس المخابرات العامه المصريه علي اليمن في زياره ماكملتش اربعه و عشرين ساعه , و كان التصريح الرسمي هوا : دعم وحده اليمن .!!
هوب بعديها السعوديه دخلت في الموضوع و شنت غارات جويه و مدفعيه علي المنطقه الحدوديه الواقعه بين السعوديه و اليمن و كان التصريح الرسمي السعودي هوا : ان العمليات العسكريه دي لحفظ الامن القومي .!!

اليمن .. كحكه و مسيرها تتاكل .!!


***********

خامس كحكه :- لبنان :

لبيروت .. من قلبي سلام لبيروت
و قبل للبحر و البيوت

اول حاجه احب اقولها ان الشعب اللبناني , هو شعب مثقف لدرجه كبيره جدا - اللهم لا حسد يعني- و الشباب اللبناني عارف مدي تعقيد العمليه السياسية في لبنان حتي لو كان الشباب دول مش مسيسيين او حزبيين .
و عن نفسي افتخر جدا ان الدول العربيه فيها بلد زي لبنان و شعب زي الشعب اللبناني .

* بس لما نيجي نبص علي طبق الكحك هنلاقي ان الكحكه اللبنانيه , كحكه مهمه جدا , لان لبنان بلد تكمن فيه العديد من الطوائف الدينيه و السياسيه , شيعه و سنه .. يساريين علي ليبراليين .. وسط و يمين .

تعالوا نبص علي القوي السياسيه في لبنان :

تنقسم القوي السياسيه في لبنان الي حلفين اساسيين هما , قوي "14 آذار" و قوي "8 آذار" .
* ضم تحالف "14 آذار" قوي سنيه و درزيه و مسيحيه , ابرزها تيار المستقبل و القوات اللبنانيه و حزب الكتائب و التيار الوطني الحر و الحزب التقدمي الاشتراكي .
* في حين ضم تحالف "8 آذار" قوي شيعيه مع احزاب درزيه و سنيه صغيره , ابرزها حزب الله و حركه امل و الحزب السوري القومي الاجتماعي و الحزب الديموقراطي .

** و المعروف ان هذا الانقسام السياسي في لبنان لم يشهد خروقات واضحه طوال الاربع سنوات الماضيه ,بإستثناء وحيد _وحيد حامد_
تمثل في خروج التيار الوطني الحر من تحالف 14 آذار و اعلانه التفاهم مع حزب الله الذي يقوده تحالف 8 آذار , ليكون الاطار المسيحي الابرز للمعارضه .
** و بنتيجه الانتخابات التي اجريت عام 2005 , حصلت قوي 14 آذار علي غالبيه نسبيه من مقاعد البرلمان , علما انها خاضت الانتخابات بالتنسيق مع حزب الله في بعض المناطق تحت شعار " منع الاحتقان المذهبي" .!!

المهم ان لبنان اتغير كتير جدا من ناحيه الجغرافيا السياسيه الداخليه اللي اتشكلت و اترسمت علي السطح اللبناني و تحديدا من بعد سنه 2005, السنه اللي اغتيل فيها رئيس الوزراء الاسبق رفيق الحريري .
و هيا برضو نفس السنه اللي شهدت وضع نهايه للوجود السوري في لبنان , بعد ما تم توجيه الاتهام الي سوريا بالضلوع في عملية اغتيال الحريري .

و سواء كانت سوريا هيا المسؤله عن اغتيال الحريري ولا لأ فالمهم ان الجيش السوري خرج من لبنان , مع وجود شك عندي انه لسه في قوي سياسيه لبنانيه مواليه لسوريا .. دا غير حزب الله الموالي لايران .!!

نروح علي حزب الله - المقاومه الاسلاميه اللبنانيه - الموجود في جنوب لبنان .
عموما اذا كان الشعب اللبناني متفق او مختلف مع حزب الله , ف انا برضو متفق و مختلف - في نفس الوقت - مع حزب الله ..!
متفق انه مقاومه ضد اسرائيل و كلنا عارفين ان المقاومه مشروعه لانهاء اي احتلال , بس مختلف مع حزب الله لانه موالي لايران , بإعتبارهم شيعه زي بعض .!
بس مش علشان شيعه زي بعض , تخلي ايران تتدخل في الشئون السياسيه الداخليه و الخارجيه اللبنانيه .
و اقرب دليل علي كدا لما حسن نصر الله - و اعذروني انا مش مقتنع بلفظ سماحه او سماحه السيد لانه انسان زينا , يعني مجاش في عشر تشهر و احنا جينا ف تسعه !!-
المهم انه قال بالنص : اقترح علي الحكومه اللبنانيه ان تطلب من ايران تسليح الجيش اللبناني و ان يكون بطلب رسمي .!! و قال برضو بالنص : علي الدول العربيه تسليح لبنان ,و انه علي الحكومه اللبنانيه ان تقول للدول العربيه : اعطونا ما عندكم من اسلحه و طائرات و دبابات , لانه احنا عارفين انها في المخازن عندكم و ان الصدأ سيأكلها !!!!!!!!!!!!!

مش عارف اقول ايه بجد بس حاسس لأ انا متأكد انه حسن نصر الله كان ساعتها بيئلش علي المشاهدين!! لان الحاله اللي كان فيها دي عباره عن حاله ما بين الدهاء و الغباء السياسي .!!!

السؤال هنا و اللي ممكن كلنا نكون عارفين اجابته هوا :
هل حزب الله يأخذ اوامر من ايران ؟
هل حزب الله يتبع منهج سياسي ايراني ؟
هل حزب الله يعمل علي زرع نفوذ ايراني داخل لبنان ؟؟؟؟؟

الكلام دا برضو مش معناه ان حزب الله كخه و الباقي ملايكه ..!
قصدك ايه طيب ؟؟ قصدي انه كله بيلعب سياسيه , و السياسه وساخه .. و المعني في بطن الشاعر ..!!

الكل طبعا سمع عن احداث لبنان الاخيره اللي كانت عباره عن اشتباكات مسلحه بين ميليشيا حزب الله الشيعي وميليشيا تنظيم الاحباش السني , و خد عندك يا معلم .. محلات اتكسرت و مواطنين سابوا المنطقه , دا غير الناس اللي راحوا ضحايا الحادث .. عاطل علي باطل .!!
برضو اهم مافي الموضوع ساعتها كان التصريحات اللي طلعت من الجانبين .. السني و الشيعي , و كانت كالآتي :-
ان هذه الاشتباكات الاخيره التي حدثت , لم تكن علي خلفيه مذهبيه او طائفيه !!!!
طب ازاي اذا كان الجانبين واحد سني و التاني شيعي ؟؟؟
طب لو مش علي خلفيه مذهبيه يبقي ايه ؟؟؟؟ بيعرضوها قدام بعض مثلا ..!
* اللي شوفته يوميها في التلفزيون و اللي تعبني جدا هوا كلام الناس اللي كانوا في المنطقة اللي حصل فيها اشتباكات .
الناس دول كان كلامهم متركز علي كام موضوع يتعدوا علي صوابع الايد الواحده و هما :-

* واحد بيقول : احنا مش عاوزين نعيش تاني في اجواء الحرب الاهليه .. مش عاوزين نعيد الكلام دا تاني .
* واحده محلها اتكسر ساعه الاشتباكات بتقول : مش كفايه انه في ازمه اقتصاديه ومفيش حاجه بتتباع , كمان جايين يكسروا المحل اللي بسترزق منه .. الله يكون في عونك يا لبنان .
* واحد بيقول : كفايه صراعات و اشتباكات مسلحه بين بعضينا .. عاوزين نبني لبنان من جديد .. يكون لبنان اللي بنحلم بيه .. عاوزين نربي ولادنا كويس .. نشوفهم رايحين علي المدارس .. مش رايحين يتدربوا علي السلاح .

انتوا شايفين الناس دماغها في ايه ؟؟ ناس بسيطه و كلامها بسيط و خالي من التسييس ..!
ناس عاوزه تشوف لبنان لكل اللبنانيين , مش لبنان للدروز بس ولا للشيعه بس ولا للسنه بس .. لبنان لكل اللبنانيين بدون تدخل قوي خارجيه
.. وبدون فتنه دينيه او حرب اهليه .
بس تقول ايه بقي , برضو القوي السياسيه بتلعب سياسه و السياسه وساخه .. و المعني في بطن الشاعر ..!

لبيروت .. من قلبي سلام لبيروت

***********

سادس كحكة :- العراق :

الله يرحمك يا عراق .

سبع سنين مرت علي تدمير العراق .. سبع سنين و العراق ممزق .. سبع سنين و العراق بيتعرض لأكبر عمليات النصب و السرقه الممنهجه
في التاريخ .!! تحف علي آثار علي نفط علي فلوس ياما , و كله اتسرق من العراق في السبع سنين دول .

إذا كان علي التحف و الآثار ف امريكا و بريطانيا قاموا بالواجب !!
إذا كان علي الفلوس ف مريكا و بريطانيا قاموا بالواجب !!
إذا كان علي النفط ف برضو امريكا و برطانيا قاموا بالواجب

الدول المتقدمة طلعوا مسجلين خطر سرقه بالإكراه ..!

نخش علي تقسيمة العراق المعقدة و اللي هيا مقسمه مابين شيعه و سنه و اكراد..
مفيش يوم يعدي الا و نسمع عن هجمات مسلحه و عمليات انتحاريه في انحاء العراق , ضحايا كتير ماتوا .. بالقصد و بغير القصد , المهم انه احنا لو ماسمعناش ان فيه تفجيرات حصلت في العراق في اي يوم يبقي دا مش العراق اللي عارفينه .. من سبع سنين .!!

* القوات الامريكيه لسه موجوده في العراق .
* ايران ليها نفوذ قوي داخل العراق .

* امريكا و من بعديها بريطانيا خسروا الحرب في العراق بعد ما نجحوا في تدمير العراق تماما ..!
دا غير ان امريكا و حربها علي العراق و المليارات اللي اتصرفت و لسه بتتصرف علي القوات الامريكيه في العراق كانت من ضمن الاسباب اللي عملت الازمة الإقتصاديه العالميه و بقي في اكتر من 130 بنك معلنين افلاسهم في امريكا .

و الحقيقه ان الحرب علي العراق ادت الي :-
* أزمة اقتصاديه عالميه .
* النجاح في السيطره علي معظم المناطق و الآبار الغنيه بالنفط العراقي .
* خسارة امريكا لقيادة العالم و فشل نظرية القطب الواحد .
* ظهور اقتصاديات جديده علي السوق العالمي زي البرازيل و الهند و الصين .
* بدايه انسحاب القوات الامريكيه من العراق .
* التدمير الشامل للعراق علي جميع المستويات الاقتصادية و السياسية و الإجتماعية و الصحيه .

بس برضو لسه العراق واقع تحت النفوذ الايراني و الامريكي المباشر , و ايا كان مين فيهم اللي هايثبت وجوده , فالحقيقة المره ان العراق هو الخاسر الوحيد في المهزله دي .

* لحد دلوقتي مفيش حكومه موحده في العراق .
* لحد دلوقتي و القوي السياسية في العراق بتتصارع علي الحكم و الوصول اليه .
* لحد دلوقتي لسه فيه عمليات انتحاريه و لسه فيه صحايا مالهمش ذنب بيموتوا كدا بالسهل .
* لحد دلوقتي و مفيش اي قوي سياسية عراقيه بتعمل حاجه ولو بسيطه لصالح الشعب العراقي .

الصراعات محدودة في كام نطاق :
صراع علي السلطه - صراع بين جبهتين , جبهة تحاول زرع نفوذ ايراني و جبهة تحاول تأكيد و توسيع النفوذ الامريكي - صراع مذهبي و طائفي .

المثير للدهشه ان احد استطلاعات الرأي اثبتت ان غالبية العراقيين شايفين ان الوضع ايام حكم صدام حسين كان احسن بكتير من الوضع الراهن ..!

العراق هايرجع عراق تاني امتي .. الله اعلم .


**********

سابع كحكة و الأخيرة :- فلسطين :

فلسطين .. انتوا عارفين فلسطين بالنسبة لي يعني ايه .. ف مش هاتكلم كتير و هاخش في الموضوع .!!

فلسطين متقسمة الي 3 جهات :-
1- الضفة الغربية ( تحت سيطره السلطة الفلسطينيه - حركة فتح ) .
2- قطاع غزة ( تحت سيطرة الحكومة الفلسطينية المقالة - حركة حماس ) .
3- فلسطين المحتلة ( تحت سيطرة اوسخ ناس في العالم .. الصهاينه ) .

1- الضفة الغربيه - حكومه رام الله - محمود عباس - حركة فتح .
في نظري انها حكومة غير شرعية لكذا سبب-مش موضوع التدوينة- بس المهم ان رئيس السلطة الفلسطينية هو برضو صاحب الدور الرئيسي في اتفاقيه اوسلوا .!! محمود عباس .
دا غير انه كل يوم يطلع يقول ان حل القضية الفلسطينية سيأتي عن طريق التفاوض و ليس المقاومة .
دا غير طبعااااا ان حكومته مواليه لأمريكا و دول الاعتدال ( مصر - السعوديه - الأردن ) .
يعني الحكم عبارة عن شوية تصريحات مش اكتر مع حبة تنسيقات بين الامن الفلسطيني التابع للسلطه و بين قوات الاحتلال بمباركة امريكية.

2-قطاع غزة - الحكومة المقالة - حركة حماس - اسماعيل هنية
اول حاجه احب اقولها اني متضامن مع غزة فيما تعانيه كل يوم .
قطاع محاصر لوجود حركة حماس الدارجه علي قائمة الحركات و الجماعات الارهابية -في نظر أمريكا والغرب و شوية عرب تيت- .
القطاع محاصر من سنة 2007 بعد الاقتتال الداخلي و بعد نزع شرعيه حكومة الوحدة الوطنية و بعد سيطرة حركة حماس علي القطاع .
و تم محاصرة القطاع لاسباب حقيقة و اسباب كدا و كدا .!! بس الاسباب اللي في اعتقادي هيا :-
* احراج حركة حماس داخل قطاع غزة بأنها المتسببة في الحصار المفروض .
* الضغط علي حركة حماس لقبول ورقة المصالحة الفلسطينية
* منع تهريب الاسلحة الي قطاع غزة عن طريق الانفاق
** النتايج :-
* مجزرة غزه اللي لسه الناس اخواتنا في غزة بيعانوا منها لحد دلوقتي .
* بناء جدار فولازي بين رفح و غزة بهدف منع تهريب الاسلحة عن طريق الانفاق .. اللي كانت اصلا شغالة بموافقة و معرفة النظام المصري ..!

المهم في القصة يا معلم ان حصار غزة مفروض بموافقة كل من حكومات رام الله و القاهرة و تل ابيب !! احيه يابو سوسو بجد ..!
يعني لو تل ابيب وافقت علي فك الحصار عن غزة , حكومه القاهرة و رام الله هايقولولها : لأ يا تل ابيب .. دول عيال مش متربية .. حاصريهم شوية كمان .!!

* ورقة المصالحة الفلسطينية :-
المعلن انها نص الطريق لإقامه الدوله الفلسطينية , بس هيا في اعتقادي لاسباب تانية , ودا اللي خلي حركة حماس ترفض الورقة دي لاعتراضها علي عدد من البنود اللي منها :-
- الاعتراف بإسرائيل .!!
- إلقاء سلاح المقاومة .!!!!
و رفض حماس للمصالحة من الاسباب اللي مخليه اسرائيل و السلطة الفلسطينيه و مصر محاصرين قطاع غزه لحد دلوقتي .

*غزة هيا المكان الوحيد في فلسطين كلها اللي مفهوش اسرائيلي واحد .
*غزة هيا المكان الوحيد المحرر من فلسطين .
*غزة هيا المكان الوحيد اللي فيه مقاومة .

حركة حماس مواليه لحزب الله اللي موالي لايران
طب حزب الله موالي لايران و قولنا عديها يا جدع علشان هما شيعة زي بعض
انما حماس ليه ؟؟؟؟؟
اعتقد ان اتباع حماس لايران بيخدم اهداف الطرفين .
** بيخدم ايران لان دا بيعملها دور اقليمي و يخليها واسعة النفوذ , ودا بعد كحكتنا الحلوة مصر ما فقدت دورها الاقليمي من زمان و بالخص بعد مجزرة غزة , فكان لازم انه توجد قوي اقليميه ذات وزن سياسي تقيل تشغل المكان الفاضي اللي سابته مصر .
** وبيخدم حماس لانها عارية الدعم السياسي و يمكن العسكري , و لأن مصر تعتبر حماس حركة ارهابية , ولأن مصر هيا راعي المصالح الامريكية و الصهيونية في الشرق الأوسط - ومعاها السعودية و الأردن- فأكيد مصر عمرها ما هتدعم حركة حماس او اي حركة تعتبرها امريكا و إسرائيل مصدر خطر
فكان لازم ان حركة حماس تدور علي داعم لسياستها , بس للأسف الاتنين و عشرين دوله عربية مفهومش راجل واحد يقدر يقول انه يدعم حركة حماس و يدعم المقاومة المسلحة

المهم ان حماس لقت في ايران الداعم القوي ليها , و الكلام دا معجبش مصر لأن بكدا الظروف السياسية هاتخلق من ايران بلد اقليمي له نفوذ
و هاتزرع لايران دور اقليمي في الشرق الأوسط لا يستهان به .

فأصبح الشرق الاوسط كالآتي :-
1- دول اعتدال ( مصر - السعودية - الأردن ) .
2- دول ممانعة ( سوريا - ايران - قطر ) .
3- محور الشر ( سوريا - ايران - حزب الله - حركة حماس ) .

1- دول الاعتدال :- تعمل وفق الاجندة الامريكية الموضوعة بالتنسيق مع الكيان الصهيوني و اللي بتضمن حماية مصالح امريكا و اسرائيل مش بس حمايتها بالقوات الامريكية الموجودة في الوطن العربي , لأ دا كمان بتضمن حماية امريكا و اسرائيل بالعرب ..!

2- دول الممانعة :- هيا الدول اللي تعتبر بتنفذ الاجنده الايرانية و بتحاول بكل الطرق انها تحرج الانظمة السايسيه فغي دول الاعتدال .

3- محور الشر :- هما مجموعة دول و حركات وضعت داخل إطار واحد محتمل انه يوجه ضربة عسكرية لإسرائيل , دا غير ان محور الشر دا هو المسبب الوحيد لحالة القلق داخل فلسطين المحتله - الكيان الصهيوني و امريكا , بإعتباره خطر موجود علي أرض الواقع يهدد مصالح امريكا و الكيان الصهيوني , بإعتبارهم كيانات موجودة تعادي المشروع الصهيوني و مصالح امريكا في الشرق الأوسط .

4- دول عربية قاعده علي القهوة بتشيش :- هيا الدول العربية اللي قلت عليها في الاول انها عبارة عن كحك موجود في الطبق كل هدفه في الحياة انه يتاكل ..
بالهنا و الشفا ..!



الخميس، 2 سبتمبر 2010

مقال الرئيس حسني مبارك بصحيفة نيويورك تايمز الامريكيه الصادره بتاريخ الاربعاء 1\9\2010



عشر سنوات مرت منذ اخر مرة اقترب فيها الفلسطينيون و الاسرائيليون من التوصل الي إتفاق سلام دائم في طابا في يناير عام 2001 , و خلال فترة خدمتي في القوات الجويه شهدت الآثار المأساويه للحرب بين اسرائيل و العرب , و كرئيس لمصر تحملت الكثير من النجاح و الفشل في عمليه السلام , حتي ان قرار مصر بأن تكون أول دولة عربيه تصنع السلام مع اسرائيل كلفها حياة رئيسها الراحل انور السادات , و شهدت اغتيال السادات عام 1981 علي ايدي المتطرفين , و منذ ذلك الوقت و انا احاول تحويل حلم السلام في الشرق الاوسط الي حقيقه .

الآن و بعد نحو عامين علي توقف المفاوضات المباشرة , نحن نفتح فصلا جديدا في هذا التاريخ الطويل , و يزعم الكثيرون ان هذه الجوله الجديده من المفاوضات المباشرة , و التي تنطلق بإجتماعات بين الرئيس الامريكي باراك اوباما و الرئيس الفلسطيني محمود عباس و رئيس الوزراء الاسرائيلي بنيامين نتنياهو و عاهل الاردن الملك عبدالله الثاني و انا , محكوم عليها بالفشل مسبقا مثل غيرها.

ان اصرار اوباما علي المشاركة في المفاوضات احيا الامل في السلام , وينبغي اقتناص هذه الفرصه.إن اسس التسويه الفلسطينيه الاسرائيليه واضحه و هي إقامة دوله فلسطينية علي الاراضي التي احتلتها اسرائيل عام 1967 , و ان تكون القدس عاصمه للدولتين اسرائيل و فلسطين, و قد حسمت المفاوضات الخاصة بالوضع النهائي للاجئين و الحدود و القدس و الامن.

إن اكبر عقبه تقف الآن في طريق النجاح هي عقبه نفسيه تتمثل في التأثير المتراكم لسنوات العنف و توسيع المستوطنات الاسرائيلية التي افضت الي انهيار الثقه علي الجانبين , و من اجل تحقيق النجاح يتعين إعادة بناء الثقة و الاحساس بالامن .
كيف نفعل ذلك؟

اولا يتعين علينا حماية عمليه السلام من اندلاع موجات جديده من العنف , ومصر مستعدة في هذا الصدد لاستئناف جهودها من اجل حسم العديد من القضايا الصعبه التي تحيط بغزه من خلال التوسط في تبادل الاسري بين اسرائيل و حماس التي تسيطر علي القطاع لوضع نهايه للحصار الاسرائيلي و تعزيز المصالحة بين حماس و فتح التي تسيطر علي الضفة.

من اجل نجاح السلام بين اسرائيل و الفلسطينيين فلابد ان يتم ذلك بإعتباره جزءا من سلام اقليمي اوسع بين اسرائيل و العرب, و تقدم مبادرة السلام العربية , السلام و التطبيــــع مقابل انسحاب اسرائيل من الاراضي العربيه و التوصل الي حل عادل لقضية اللاجئين , لكي يتعين علي الطرفين خلال هذه الفترة الانتقالية إظهار ان هذا الحلم في متناول اليد , و علي الدول العربية ان تواصل التدليل علي جدية مبادرتها من خلال خطوات تلبي امال و تبدد مخاوف رجل الشارع الاسرائيلي .

من جانبها يجب علي اسرائيل ان تنتبه الي ان المستوطنات و السلام لا يلتقيان , بل ان المستوطنات تعمق الاحتلال الذي يسعي الفلسطينيون الي انهائه, و الوقف التام للتوسع الاستيطاني في الضفة الغربيه و القدس الشرقيه هو امر مهم اذا كان للمفاوضات ان تنجح.

و بالنسبه للجانبين فإن عمليه بناء الثقه لا يمكن ان تقوم الا علي امن ملموس , لكن الامن لا يمكن ان يعطي شرعية لاستمرار الاحتلال الاسرائيلي للاراضي الفلسطينية , إذ انها تقوض المبدأ الجوهري القائم علي الارض مقابل السلام , و انا ادرك حاجه اسرائيل المشروعة للامن , و الذي يمكن ان يتفق مع مطلب الفلسطينيين العادل للانسحاب الكامل من الاراضي المحتله و مصر تعتقد ان وجود قوات دولية في الضفة الغربية يجري نشرها لمدة يتفق عليها من قبل الاطراف , يمكن ان تمنح كليهما الثقة و الامن .

و اخيرا فإن مصر علي اهبه الاستعداد لاستضافة الجولات التالية من المفاوضات فكل الاتفاقات الاسرائيلية الفلسطينية التي تم التوصل اليها تمت بمشاركة مصرية نشطة و بتعاون وثيق مع الولايات المتحدة , و كانت محاتدثات عام 2001 في طابا اقرب نقطة لتوصل الطرفين الي اتفاق ينهي الصراع .
دعونا نبدأ من حيث انتهي الطرفان علي امل ان تؤدي روح المشاركة التي اتسمت بها هذه المحادثات الي النجاح .

نحن نعيش في عالم يعاني من مرارة التطرف , و التوصل الي سلام دائم بين الفلسطينيين و الاسرائيليين سيعيد الامل الي الشرق الاوسط و للشعوب في كل مكان و كشخص شهد الدمار الذي تسببه الحرب و آمال السلام اناشد جميع الاطراف ان تعمل علي انجاح هذه الجولهة الجديدة من المفاوضات .